«Марий памашлан» 50 ий темын

30 ноябрьыште Сеҥымашын XXX идалыкше лӱмеш тӱвыра полатыште Россий калык усталыкын сулло коллективше «Марий памаш» фольклор да этнографий ансамбльын 50 ияш лӱмгечыжлан пӧлеклалтше концерт эртен, увертара «Марий Эл» газет.

Ты коллективым 1974 ийыште республикын Тӱвыра министерствыжын темлымыж почеш Калык усталык пӧрт пелен Марий АССР сымыктышын сулло пашаеҥже, Марий Эл Кугыжаныш да Самырык-влаклан Олык Ипай лӱмеш кугыжаныш премий-влакын лауреатше, композитор Виктор Данилов чумырен.

Эн ончыч изирак оркестр семын пашам ыштеныт, вараракше мураш, а эше изиш варарак кушташ тӱҥалыныт. Вуйлатыше ансамбльын репертуарышкыже калыкнан тӱвыражым, йӱлажым, койыш-шоктышыжым почын пуышо муро ден куштымаш-влакым чумырен.

Артист-влаклан сценылык вургемымат ямдылыме шотышто тургыжланен. Сем дене пойдарыме пашам шкеже шуктен гын, куштымашым шындаш РСФСР-ын сулло, Марий АССР-ын калык артистше Надежда Дружинина-Кузнецовалан ӱшанен.

Ансамбль ий гыч ийыш вияҥын, артист-влакат ешаралтыныт.

Чолга да уста вуйлатыше Виктор Петровичын тӱҥалын кодымо пашажым ынде 35 ий Марий Эл сымыктышын сулло еҥже, Россий Правительствын «Рушэлын чонжо» премийжын лауреатше Мария Соловьёва шукта, шкежак куштымашым шында. Ансамбльын хормейстерже — Марий Эл тӱвыран сулло пашаеҥже Эльвира Трифонова, концертмейстерже — Валентин Архипов.

Чынжымак, «Марий памаш» калыкнан мурыж ден куштымашыжым арален толеш да сценыште моштен ончыкта. Витле ийыште ты коллективын репертуарже республикысе тӱрлӧ район да марий-влакын тӱшкан илыме кундемласе куштымаш-влак дене пойдаралтын. Тидыжым пайрем концертыште ужаш йӧн лийын.

Ты коллектив Российын ятыр регионыштыжо веле огыл, йот эллаштат марий койышым ончыктен, кундемнам чапландарен. Кугу кӱкшытыштӧ эртаралтше фестиваль-конкурсышто гына вич гана Гран-при дене палемдалтын.

2022 ийыште кок миллион теҥге грантым сеҥен налмыже ансамбльын материалле да техникле негызшым пойдараш, артист-влакын костюмыштым уэмдаш сайын полшен.

Кызыт ансамбльыште нылле наре участник мура да кушта. Нунышт республикын тӱрлӧ районжо гыч улыт.

Лӱмгечылан пӧлеклалтше концертын икымше ужашыштыже коллективлан тӱҥалтышым пуышо Виктор Данилов ден Надежда Дружининан шындыме куштымашыштым ончыктышт, а весыштыже Мария Соловьёван пашажым ужынна.

— Пайрем концертлан лӱмынак Морко сӱан ден Провой вел мурен-куштымашым шынденам. Костюмымат уым ургыктенна, — палемдыш Мария Лазаревна. — Репертуарым пойдарымаште хормейстер Эльвира Андреевнанат надырже кугу. Чынжымак, «Марий памаш» ансамбль кугезе поянлыкым арален толеш да сценыште тудым моторын ончыкта. Тидым концертыш толшо ветеран-влакат палемдышт, воза «Марий Эл» газет.

MariUver

Фото: Калык усталык да тӱвыра каныш шотышто республикысе шанче-методике рӱдер «КонтактыШте» мервотышто

Рушэлын чонжо — Душа России,
материалле да техникле негыз — материально-технический базе
мервот — соцсеть