Суомисе финн-угор ушем лӱмгечыжым палемда

Шукерте огыл финн «Родо-тукым калык-влакын йолташышт» регистрироватлыме объединенилан — Sukukansojen ystävät ry 25 ий темме идалыкым почыныт. Тидын нерген ушемын чолгаеҥже Эза-Юсси Салминен Facebook мервотышто увертара.

Мероприятий Хельсинки олан Рауханасема полатын пайрем залыштыже эртен.

Касыште Alkukoti финн-угор журналын у 16/2024 номерже дене палдареныт. Тыгак организацийын у вотлаштыкшын презентацийже лийын, тудым вашке почыт. Ушемын вуйлатышыже Алекси Палокаҥгас объединенийын у логотипшым ончыктен.

Нико Партанен Alkukoti журналын сайтше дене палдарен. Тушто савыктышын ончыч лекше номерже-влакым лудаш лиеш. Пытартыш номер организацийын еҥже-влаклан ушемын журналже семын яра шаралтеш. Объединенийын членже лияшлан ийлан ик газна 12 евро взносым тӱлыман. Кӧ ушемын еҥже огыл гын, тудо журналым 14 евролан налын кертеш.

Савыктышын пытартыш номерже молгунамсе деч кӱжгырак да нелырак. Да тушто ятыр кугу да келге шонымашан материал.

Финн родо-тукым ушемлан 1999 ийыште негызым пыштыме. Тунам тудо «Финляндийын родо-тукым объединенийышт-влак ассоциаций» — Suomen sukukansayhdistysten liitto маналтын. Да тудым МАФУН-ын пашажым Суомиште виктарен шогаш ышталтын. Чаманен каласыман, тиде сомылым, Российын политикыжлан кӧра, кызыт шукташ ок лий, воза Эза-Юсси Салминен.

MariUver