Иван Петровын 130 ияш лӱмгечыжым палемденыт

Теле тылзын 14-ше кечынже Иван Петровын шочмыжлан 130 ий темын. Тидын шумлык Марий Элыште мероприятий-влак эртеныт.

13 декабрьыште Морко район Шеҥше селаште И. Петровым шарныме мероприятий-влак тӱвыра пӧртыштӧ да школышто эртаралтыныт.

14 телыште Валериан Васильев лӱмеш Йылмым, сылнымутым да историйым шымлыше марий институт (ЙСИШМИ) «Исполком председатель: кугыжаныш да мер пашаеҥ Иван Петрович Петровын 130 ияш лӱмгечыжлан пӧлеклалтше «йыргешке ӱстел» лийын.

Тылеч ончыч Йошкар-Оласе Петров уремын 2-шо номеран пӧрт пырдыжыште кечыше шарнымаш оҥаж воктеке пеледышым пыштеныт.

Марий Эл КТРК-ан видеосюжетше:

А вара марий калыкын лӱмлӧ эргыже Иван Петровын илыш корныж да пашаж нерген институтын кугурак шанче пашаеҥже, историй науко кандидат Олег Петров каласкален.

Марий кугыжаныш университетын (МарКУ) профессоржо, историй науко доктор Алексей Иванов «Война телеграмм: И.П. Петров и продовольственный вопрос в МАО в начале 1920-х годов» докладым темлен.

МарКУ-н доцентше, историй шанче кандидат Родион Чузаев 1920-шо ийлаште Маробластьым вуйлатыше-влакын ончыкылыклан кундемым вияҥдыме да калыкле йодышла шотышто пунчал-шамычым луктедымышт нерген ойлен.

Ты кечынак кастене М.Шкетан лӱмеш Марий драмтеатрыште «Тудын ӱмыр – волгыдо шӱдыр» шарнымаш кас лийын. Тусо сценыште «Марий Эл», «Марий памаш», «Морко кундем» ансамбль-шамыч, профессионал артист ден мурызо-влак выступатленыт, воза «Кугарня» газет.

МЭТР ТВ-ын видеокаласкалымашыже: