2023 ий 15 октябрьыште композитор, Марий Эл сымыктышын сулло пашаеҥже, Марий Эл Республикын гимнжын авторжо Юрий Савватеевич Евдокимов-Тойварс (1950-2023) илыш гыч каен, увертара «Марий Эл» газет.
Тудо 74 ийыш тошкалын ыле. Лӱмлӧ семлызе – шуко тӱрлӧ сочиненийын авторжо, нунын коклаште сцене жанран произведений-влакат улыт. Тиде – «Илыше вӱд» балет, «Степан Микалэ» опер да «У Вечного огня» симфоний поэме, кок симфоний, симфониетте, камер-семӱзгарле ден вокалле произведений-влак.
Композиторын саскале пашаштыже йоча сылнысем школлаште тунемше-влаклан чумырымо репертуарже кӱлешан верым налын шога. Тудо 1-4 да 5-7 класслаште тунемше-влаклан фортепиано пьесан икмыняр сборникым ямдылен.
Юрий Савватеевич 1950 ий 12 январьыште Пермь кундем Суксо районысо Эҥертӱҥ ялыште шочын.
Эҥермучаш школым тунем лекме деч вара Йошкар-Олаште Йыван Палантай лӱмеш музык училищын дирижёр-хорысо пӧлкажын ямдылалтме курсышкыжо тунемаш пурен. Музыкым возаш кумылан улмыжым да музык шотышто теорийын негызшым келгынрак шымлаш кӱлмым умылымек, 1968 ийыште теорий пӧлкаш куснен. Ты жапыштак Анатолий Лупповын вуйлатымыж почеш композиций классыште шинчымашым поген. 1971 ий гыч 1976 ий йотке Озаҥ кугыжаныш консерваторийын теорий-семлызе факультетыштыже тунемын.
Консерваторийым тунем лекмекыже Йошкар-Ола 1-ше №-ан Музык-сӱретче школ-интернатыште сольфеджиом да композицийым туныктышылан ыштен, а 1984 ий гыч – Марий хор капеллыште хормейстер-фольклористлан.
Пытартыш икмыняр лу ий композитор Пермь крайыште илен, воза «Марий Эл» газет.
MariUver
MariUver 