Марий Эл Морко район Унчо школын «Чолга шӱдыр» усталык коллективше «Сценыште ончыктымо эн сай программе» да «Эн сай сценарий» таҥаслаште икымше степенян лауреат лӱмым сулен. Нуно Ӱдырсий пайремым модын ончыктеныт, увертара «Ямде лий» газет.
Кугезына-влак калык фольклорым, пайремым, йӱлам арален кодаш ятыр вийым пыштеныт. Ты поянлыкым тукым гыч тукымыш самырык-влак пеҥгыдемдышаш улыт. Тыге тӱвырана вияҥеш, йылмына тӱзлана. Йоча да самырык-влаклан «Кугезе вож» фольклор фестиваль тыгай шонымаш денак эртаралтеш.
Тудо 27 февральыште Оршанке посёлкысо тӱвыра рӱдерыште лийын. Пайремыш Морко, Марий Турек, Кужэҥер, Советский, Оршанке, У Торъял, Медведево, Курыкмарий, Звенигово районла гыч латкок коллектив чумырген. Калык модышым, йӱлам, пайрем мурым, куштымашым ончыктеныт.
– Луымшо классыште тунемме годым Шабдар Осыпын «Ӱдырамаш корно» романжым лудынна. Произведенийысе герой-влак Марина ден Ануш ӱдырвучым пуалтеныт. Мо тыгай ӱдырвуч, молан да кунам тудым пуалтеныт? Нине йодыш-влаклан вашмутым класс вуйлатышына Людмила Константиновна Игнатьева деч йодынна. Тудо Ӱдырсий пайрем нерген келгынрак пален налаш, шымлыме пашам пырля возаш темлен. Тыге модмашым калык ончыко луктынна, – ойлат ӱдыр-влак.
«Эн сай шымлыме паша» таҥасыште икымше верым Морко район Красный Стекловар клуб пеленысе «Ромашка» ансамбльын участникше Ева Васильева налын.
Советский район Кужмарий школын тунемшыже Настя Алембаева «Фольклор произведенийым эн сайын модын ончыктымаш» таҥасыште сеҥышыш лектын, воза Елена Иванова «Ямде лий» газетыште.
Унчышто войзымо «Ӱдырсий» видеом ончыза:
Видео гыч скриншот-влак:
MariUver
Видео: Лёша Иванов
MariUver 