Пургыж тылзын 11-ше кечынже Таллинныште Eesti Laul 2023 («Эстон муро 2023») финалыште икымше верым Алика лӱман мурызо налын. Тудо англичанла Bridges («Кӱвар-влак») мурым мурен.
Суперфинал Tondiraba ий ареныште эртен. Алика Милова 13 141 йӱкым поген. Кокымшо верыште Оллие мурызо 10 280 йӱк дене. Кумшо Bedwetters панк ансамбль — 7991.
Мурызо-влакым, ончышо-влак деч посна, тыгак тӱнямбал кӱкшытан жюриат аклен. Алика кок категорийыштыжат икымше лийын.
Тыге Алика тений май тылзыште эртыше Евровиденийыште Эстоний лӱм дене мураш тӱҥалеш. Муро конкурс Английыште, Ливерпуль олаште эрта.
Алика шкеже эстон огыл, Нарва олаште 2002 ийыште шочын да туштак кушкын. Ушештарена Нарваште шукыракшым руш-влак илат. Но мурызо эстонла пеш сайын кутыра — аваже йочам эстон школыш тунемаш пуэн.
Алика Bridges мурым финалыште мура:
MariUver
Фото: ERR
MariUver 