Сето-влак Теле пайремыштым палемденыт

Таче Тарту олан рӱдӧ Ратуша кумдыкыштыжо сето-влак шке Рошто — talsipühiq пайремыштым пайремленыт.

Мероприятийыште Liinatsuraq, Ilolang да Kullakõsõ хор-влак муреныт, куштымаш семым Kiiora ансамбль шоктен.

Пайремыш погынышо-влак выступатлыше-влак дене пырля сето калыкын акрет годсо шуко йӱкан леэло мурышт-влакым мурен, семӱзгар шоктымым колышт, пырля кушталтен кертыныт. Тыгак янда гыч изи пӧртыштӧ мастар-классыште кожеш сакалыме сӧрастарымаш ӱзгарым ышташ тунемаш йӧн лийын.

Рошто да У ий вашеш тӱҥ плошадьыште почмо Волгыдылык изолан — valgusküla пытартыш мероприятийже лийын. Тиддеч вара пайрем городокым кораҥдат, но коньки дене мунчалтыме вер пургыж тылзе мучаш марте кодеш, воза Postimees газет.

Эстонийын ик этникле тӱшкаже — сето-влак элын кечывалвел могырыштыжо илат, нунын шке «королевствышт» уло, культурышт да йылмышт дене моло эстон-влак деч ойыртемалтыт. Тыгак сето-влак ортодокс йӱлам кучен шогат. Садлан Рошто пайремымат кок гана палемдат: уло Эстоний дене пырля 25 декабрьыште да 7 январьыште.

Пайрем гыч фотосӱрет-влак: