Эстонийыште марий-влак дене палдарат

Шыжа тылзын Эстоний мучко Родо-тукым кече-влакым кумдан эртарат. Поснак шуко мероприятий ты арнян. Верысе марий-влакат калыкна нерген каласкалат.

Октябрь тылзын кумшо шуматкечыже Эстонийыште кугыжаныш пайрем улеш — Родо-тукым кече. Тений тиде 15-ше числа лиеш. Кумшо арня Родо-тукым арня маналтеш да поснак финн-угор мероприятий-влаклан поян.

Верысе марий-влакат Родо-тукым кече-влакым эртарымашке кумдан ушненыт.

Тыге, мутлан, Таллинн воктен улшо Кейла изи олан социалле рӱдерыштыже 4 шыжаште Жанна Тохтын «Мо нерген марий тӱрлем ойла?» ончерже почылтын. Тудым 28 числа марте ужаш лиеш.

7-ше октябрьыште Ж.Тохт Людмила Ямурзина да Галина Карпенко Костивере школ йоча-влаклан марий-влак нерген каласкаленыт.

9-ше октябрьыште «Таллинн марий ушем» «Марий йӱкпале ден мут-влакым чын возена» туныктымашым эртарен колтен. Васли Николаев организацийын чолгаеҥышт-влаклан марий шрифт, кодировко да полдышоҥа радам нерген каласкален.

Шыжа тылзын 10-14-ше кечылаштыже Таллинн Ыйсмӓэ гимназийыште Родо-тукым арня эртен. Шочмын Жанна Тохт ден Алексей Алексеев «Марий Элыш унала» лекцийым лудыныт изирак да кугырак тунемше-влакланат. Ӱдыр-влак технологий урокышто марий подкогыльым ышташ тунемыныт. Шочмо йылме уроклаштат родо-тукым финн-угор калык-влак нерген каласкалат.

Шуматкечын Таллинныште Родо-тукым гала-концерт эрта. Тушто Анна Макеев да «Таллинн марий ушемын» ансамбльже выступатлаш тӱҥалыт. Эрлашыжым тыгак кугу концерт Тартушто, Эстон калык тоштерыште, лиеш. Туштыжо эше «Тарту марий-влакын ушемыштын» «Марий кумыл» ансамбльжат шке мастарлыкшым ончыкта.

Родо-тукым кече-влак октябрь тылзе мучаш марте шуйнат. Да уло эл мучко шуко моло мероприятий лиеш.