Талешке кечым Латвийыштат палемденыт

Вӱдшор тылзын 30-шо кечынже Ригаште эстон марий-влак Талешке кече лӱмеш Марий тӱвыра кечым эртареныт.

Мероприятий-влак «Латвийысе эстон ушемын» полатыштыже лийыныт. Тӱрлӧ марий арверым, книгам шарыме да выставке-влакым ямдылыме годым икымше уна-влакат толын шуыч. Тиде верысе илалшырак марий ӱдырамаш латыш пелашыж дене.

Тыгак пайремыш Финляндий гыч марий чолгаеҥ Раиса Тоссавайнен толын.

Культур кече Наталья Лилльын марий тӱр мастар-классше дене тӱҥалын. Таллинн гыч модельер марий тӱр нерген ойлен да тӱрлаш туныктен. Тыгак Натальян ELU ILU – ILU ELU (Илыш моторлык — моторлык илыш) ончерже шарыме лийын.

Вара толшо уна-влакым марий подкогыльым ышташ туныктеныт.

17 шагатлан Жанна Тохт «Мо нерген марий тӱрлем ойла?» ончержым почын. «Таллинн марий ушемын» ансамбльже концертым ончыктен.

Мучашлан пайремыш толшо-влак марий подкогыльым тамлен ончен кертыныт.

Мероприятийым «Таллинн марий ушем» парышдыме объединений «Эстонийысе изи калык-влак ассоциаций» да «Латвийысе эстон ушем» дене пырля ямдыленыт. Проектлан оксам Эстонийысе родо-тукым калык-влак программе ойырен.

Ушештарена, Талешке кечын, 26 апрельыште, Таллинныште Лаура Кыйв «Полярисын куржмыжо II» (Polaris Escape II) марла графикан новеллыжын презентацийжым эртарен. Таче, 3 майыште, тиде савыктыш дене Тарту Литератур пӧртыштӧ палдарат. Мероприятийым Татьяна Алыбина ямдылен.