Республикысе Марий юмыйӱла ушем «Югыпого. Эргечыш корно», рушлаже «Наследие. Путь к истокам», у проектым илышыш шыҥдараш тӱҥалын.
Проектым Марий Элын Тӱвыра, савыктыш да калык паша шотышто министерствыжат сайлан шотлен да шонымым шукташ полышым пуэн.
Ушемын еҥже-влак кумалтышлашкышт лектын кошташ, вашлиймаш ден «йыргешке ӱстел» йыр мутланымашым эртараш тӱҥалыт.
Тидын дене пырля кумалме вер-влакым шымлыме паша каяш тӱҥалеш. А ты пашаш Тимофей Евсеев лӱмеш калыкле тоштерын специалистше-влакым ушаш палемдыме.
6-8 октябрьыште проектын участникше-влак Одо Республикысе Кизнер район Марий Сарамак, Татарстанысе Агрыз район Кӧлегеш, Свердловск областьысе Красноуфимск район Вӱдан Сарсаде да Пошкырт Республикысе Калтаса район Тошто Калтаса яллаште лийшаш улыт.
Марий Эл гыч кайыше делегацийыш Марий юмыйӱла ушемын общиныже-влакын вуйлатышышт, онаеҥ ден Т.Евсеев лӱмеш калыкле тоштерын специалистше-влак пуреныт.
Светлана Носова,
«Сурт-пече» газет 07.10.2021 ий
Фото: Эрвел кундем онаеҥ-влак кумалтышым эртарат
MariUver 