Эстон музей тошто марий фото-влакым ончыкта

Эстон калык тоштерыште 27 пургыж гыч 17 шыжа марте «Калык — тиде еҥ-влак манмым ончыкта» («Rahvas — see tähendab inimesi») лӱман фотоончер ышта. Тушто ожнысо фотосӱрет-влакыште марий-влакымат ужаш лиеш.

Ойырен налме фотосерий-влак этнографийын эртыме корныж дене палдарат да тыгак ончыктымо калык-влак нерген каласкалат.

Историйыш экскурс эстон-влак гыч тӱҥалеш да эркын-эркын йылме, тӱвыра да географий шотышто торашкырак наҥгая. Мӱндыр нганасан да венгр-влак декат намиен шукта да адак мӧҥгешла эстон-влак деке пӧртылта.

Выставкыште ончыктымо снимке-влакын эн кугу ужашыже Россий этнографий тоштерын архивше гыч налме. Эн тоштыжо 1867 ийыште Москошто эртыше Икымше пӱтыньроссийысе этнографий ончерлан ыштыме улыт.

Выставкыште тыгак Венгр этнографий тоштер да Финляндий калыкле музей гыч фото-влакым ужаш лиеш.

Ты ончер 16-18 июньышто Тартушто эртыше Финн-угор калык-влакын VIII конгрессышт вашеш почылтын.

Ушештарена Эстон калык тоштер тыгаяк лӱман фотоальбомым савыктен луктын.