Эстонийысе родо-тукым калык-влак программын каҥашыж ден Финн-угор литератур ассоциаций урал йылме ешыш пурышо да шке кугыжанышдыме родо-тукым калык гыч улшо писатель ден кусарыше-влаклан талук еда эртаралтше литератур премий нерген увертарат.
Сылнымут премий одо писатель да мер пашаеҥ, талантан почеламутчо, прозаик, драматург, фольклорист, критик, этнограф, йылмышанчызе, туныктышо да кусарыше Кузебай Герд (1898-1937) лӱмеш ышталтын. Тудо ик эн ончыч йоча-влаклан удмурт йылме дене книгам луктын.
Литератур премийын номинантше пытартыш ныл ий жапыште (2016-2020) шкешотан сылнымут произведенийым але кусарыме книгам лукшо-влак лийын кертыт.
Сылнымут премийын категорийже-влак:
1. Прозо сылнымут произведений (роман, новелле-влак пого, повесть);
2. Поэзий произведений;
3. Кусарыме произведений (роман, новелле-влак сборник, почеламут-влак пого, пьесе, эссе – утларакше урал йылме гыч кусарыме шотыш налалтеш);
4. Йоча книга;
5. Драматургий произведений (пьесе, фильмлан сценарий, оперлан либретто).
Премий фонд – 2500 евро. Тудын кугытшым, тыгак могай категорийлан да мыняр пуышашым жюри рашемда.
Премийым налшаш шонышылан 2020 ий 1 сентябрь деч ончыч marika@fennougria.ee электрон почтыш колтыман:
1) савыктыме произведенийым – PDF форматыште але почто дене 2 экземплярым;
2) йодмашым (эстон, руш але англичан йылме дене).
Тушто премийын номинацийжым, фамилийым, лӱмым, ачалӱмым (але псевдонимым), шочмо кечым, пашам ыштыме верым, мӧҥгысӧ да паша верысе адрес ден телефоным, электрон почтын адресшым ончыктыман;
3) авторын возымо да тылеч ончыч савыкталтше але кусарыме произведенийже-влак
спискым (эстонла, рушла але англичанла);
4) эксперт-влакын 1-2 темлымашыштым – аклымыштым (эстонла, рушла але англичанла).
Савыкталтше произведенийым кок экземпляр дене тыгай адрес дене колтыман:
Hõimurahvaste programm
Marika Alver
Pärnu mnt 28
Tallinn 10141
Эстоний
Документ-шамычым у йодмаш дене веле колтыман. Автор-лауреат-влакын лӱмышт 1 ноябрьыште одо серызе Кузебай Гердым лӱен пуштмо кечым шарныме семын увертаралтеш.
Родо-тукым калык-влак программын координаторжо
Марика АЛЬВЕР
Налмывер: Фенно-Угриа Тӧнеж
MariUver 