Тартушто оласе монча почылтын

Тарту олан Анне мончаже

Эстоний тапырын-тапырын коронавирус дене кылдалтше аҥысыремдыме илыш радам гыч лектын толеш. Икымше июнь гыч тӱшка монча да кинотеатр-влак почылтыныт. Тыгак Тарту оласе Анне саунат пашажым ышташ тӱҥалын.

Почылтыныт гынат, шучко чер деч аралалташ манын пуртымо 2×2 правилым шуктыман. Але манына, чак кок еҥ деч шукырак лийын ок керт да, кертме семын, вес еҥ деч кок метр тораште лийман.

Садлан, мутлан, Анне мончаште фойем ястареныт. Кассыш черетыш шогалше еҥ-влаклан вес еҥ деч могай тораште лияш кӱлмым ончыктышо тасма-влакым кӱварыш пижыктеныт. Фойеште да монча пӧлка ончылно шинчаш вераҥдыме пӱкен-влакат икте-весышт деч тораште улыт.

Монча озан шинчыме ончылныжо аралтыш яндам вераҥденыт. Вургем шкаф-влакым икте гоч кучылташ лиеш, садлан шинчыме теҥгылымат шкаф ончылно икте гоч кодымо.

Мушмо верыштат шинчыме вер-влакым шахмат радам дене шелме. Куш шинчаш ок лий, йошкар-ошо тасмам пижыктыме.

Мутат уке, чыла вере кидым дезинфицироватлыме нӓстӓм вераҥдыме. Да 2×2 правилым шукташ кӱлмӧ нерген увер лаштык-влакым пижыктыме.

Икымше кечын калык мончаште шагал ыле: 50 веран пӧръеҥ пӧлкаште 5-7 еҥ веле ыле.

Кинотеатр-влакат 2×2 правилым шуктышаш улыт да зал 50% вел темалтшаш.

Чыла фото:

Тарту олан Анне мончаже

MariUver