Apple планшет ден телефонлан марий клавиатур лектын

Ынде Apple смартфон ден планшетлаштат марий полдышоҥа радамым кучылташ лиеш. Тидлан шке аппаратыш SwiftKey Keyboard приложенийым шындыман да туш марий клавиатур радамым ешарыман.

Пытартыш ийлаште iOS-ышто марий йӱкпале-влакым возаш куштылгыжак лийын огыл. Ала-мыняр ий ончыч лийше Марий клавиатур радамым, тудым ыштыше Йошкар-Ола гыч «Студия 158» фирме, App Store кевыт гыч шкак кораҥден ман ойлат.

Шукерте огыл SwiftKey Keyboard ешартышым уэмдымекем, йылме-влак коклаште «Марий» ман возымо йылмымат ужым. Тудым шупшыл налман.

Марий буквам лукташ паҥгам темдалын ик жап изиш кучыман. Мутлан «ӧ» йӱкпалым лукташлан «о» кнопкым темдал кучыман, темдалмеке «о» ден «ӧ» лектыт. Тыгак моло буква дене н — ҥ, у — ӱ, ы — ӹ, а — ӓ.

«SwiftKey-лан марий полдышоҥа радамым Жюльен Бэйли (Julien Baley) дене пырля иктаж кок ий ончычак темленна ыле. Жюльен тунам пашам ту фирмыштак ыштен. Тынаре жап эртымеке веле йылмынам приложенийыш ешареныт», — рашемдыш Андрей Чемышев.

Ушештарена, Android-ышто марий йӱкпалым возаш кунамсек ала-мыняр йӧн уло. SwiftKey деч посна Gboard – Google клавиатур. Gboard-ыште марий йылме да курык марий полдышоҥа радам посна улыт. Тыгак посна Марийская клавиатура марий йылме пакет уло, кудыжо AnySoftKeyboard приложенийлан ышталтын.

MariUver