Лишыл жапыште республикыштына ял, села лӱмым ончыктышо корно указатель-влак чын марла возымо лийыт але уке – илена, ужына. Мо гынат, тидлан шкешотан ошкыл ышталтын. Марий Эл правительстве пеленысе кугыжаныш йылме-влак шотышто комиссийын черетан заседанийыштыже ик йодышыжым лач тидын шотышто тарватыме ыле.
Докладым Марий Эл Республикын транспорт да корно озанлык министрже Александр Желонкин ыштен. Кызытеш кундемыштына ял, села лӱм-влак куштыжо рушла веле ончыкталтыныт, кушто гын йоҥылыш сералтыныт. Комиссий улшо экшыкым кораҥдаш, а у указательым шогалтымеке, чылажымат кок йылме дене чын возаш темлымашым ыштен.
Республикын транспорт да корно озанлык министерствыже ты пашашке калыкымат ушнаш ӱжеш: йоҥылыш возымым ужыда гын, министерствыш серышым колтыза. Меат ӧрдыжеш огына код, корныш лекмеке, утларак эскераш тӱҥалына. Сандене, поро лудшына-влак, фотоан материал дене редакцийышкынат увертарен кертыда.
Заседанийыште тыгак Йошкар-Олаште да Медведево кундемыште калыкым палдарыме уверым савыктыме годым республикысе кугыжаныш йылмылам кучылтмо йодышым ончымо. Рӱдолаштына вывеске да моло увертарымаште рушла да марла возымым ужына гын, Медведевыште укеат манаш лиеш. Сандене тусо администрацийланат вывескым да моло увертарымашым ямдылыме годым марий йылме дене возаш кӱлмым ушештарыме.
Эше ик йодыш – республикыштына шуко профилян, тӱрлӧ йылме дене туныктымо (полилингвиальный) школым почмо шотышто шоналташ жап. Татарстаныште да Башкортостаныште тыгай ошкылым ыштеныт. Республикынан туныктымо да шанче министрже Наталья Адамова ты опытым пален налаш да пашалан пижаш лийме нерген ойлен.
Эдуард ИМАНАЕВ
Налмывер: 2020 ий 27 март 13 (1579) № «Кугарня» газет
MariUver 