Родо-тукым кече тӱп калык ийдалыклан пӧлеклалтын

hoimupaevad-2018_uncho_uzhara2.jpg

Тений Эстонийыште эртыше Финн-угор родо-тукым кече-влак Тӱп калык йылмын тӱнямбал идалыкшылан пӧлеклалтын. Нуно шыжа тылзын 11-ше кечынже тӱҥалыт да 20-шо марте шуйнат, увертара Эстонийысе парышдыме организаций «Фенно-Угриа Тӧнеж».

2019 ийым Ушнышо Наций-влакын Организацийышт (УНО) Тӱп калык йылмын тӱнямбал идалыкше семын увертарен. Садлан тенийысе Родо-тукым кече-влак тӱп калык-влакын йылмыштлан пӧлеклалтыныт. Йомын кертше йылме-влакын кызыт могай улмыштым сайрак палаш да нунын кӱлешлыкыштым ончыкташ манын тыге ышталтеш. Тӱнямбалне шым тӱжем улшо йылме гыч кок тӱжемат кудшӱдӧ кандашлыже йомын кертеш. Тыгак шуко финн-угор йылмат туткарыште улеш.

Родо-тукым кече-влак 11-ше шыжан Эстон йылме институтышто «Тӱп калык да йылме-влак глобализироватлалтше тӱняште. Йӧсылык, йӧн да лӱдыкшылык-влак» конференций дене почылтеш. Тушто изи калык йылмын престижше, шукыйылмылык да финн-угор йылме-влакым цифр форматыш кусарыме нерген ойлаш тӱҥалыт.

Родо-тукым кече-влакын гала-концертышт Тартушто 19-ше октябрьыште Эстон калык тоштерыште 15 шагатлан да эрлашыжым Таллинныште Эрыкан Сценыште (Vaba Lava) 16 шагатлан тӱҥалыт.

Пайремыш Коми да Марий Эл гыч фольклор ансамбль-влак толшаш улыт. Одо тӱвыра дене Татарстан гыч самырык талантан семмастар Павел Александров палдара. Кечылаш эрзя «Мерема» ӱдырамаш мурышо группым да кумдан палыме «Magos» венгр фольклор коллективымат вучат.

Ансамбль-влак Эстоний мучко гастроль дене кудалышташ тӱҥалыт. Нуно школ да тӱвыра пӧртлаште концертым ончыктат, тӱрлӧ вашлиймаште лийыт. Чӱчкыдын тыгай пайремыш верысе фольклор коллектив-влакат ушнат.

Тыгак эл мучко финн-угор калык-влаклан пӧлеклалтше тӱрлӧ ончер, кино да сылнымут кас-влак эрташ тӱҥалыт. Родо-тукым кече кышкарыште Йаан Тоомиҥгын «Virantanaz» вепс эпос почеш шындыме «Юмо-влак мландыште!» постановкыжым ужаш лиеш.

Родо тукым кечыла нерген рашрак «Фенно-Угрийын» лаштыкыштыже лудын кертыда.

Фенно-Угрийын уверже почеш
MariUver

Фотом Кай Тийслӓр ыштен, Фенно-Угрийын сайтше гыч налме: «Унчо ӱжара» ансамбль 2018 ий Родо-тукым кечын гала-концертыштыже Таллинныште

Оставьте комментарий

Filed under Тӱвыра да сымыктыш, Увер-влак, Фольклор да йӱла

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s