Мурыжым йоҥгалтарат
24 майыште Йошкар-Олаште «Колумб лудмаш» поэзий да муро усталык конкурс лиеш. Тудым Республикысе тӱвыра рӱдер, Йошкар-Оласе администрацийын тӱвыра да туныктыш управленийышт эртарат. Конкурс марий поэт-новатор Валентин Христофорович Колумбын лӱмжым нумалше Йоча да самырык-влаклан книгагудышто лиеш, 10 шагатлан тӱҥалеш.
Оласе конкурс кок: сылнымут да сем (музыкальный) – номинаций дене эрта. Икымше номинацийыш ушнышо-влак В. Колумбын возымыжым лудыт, тыгак поэтын вес йылмыш кусарыме почеламутшо-влакым йоҥгалтараш тӱҥалыт. Вет уста марий поэтын возымыжым руш, эстон, финн да моло калыкын йылмыш кусарыме. Конкурсант-влак шке возымо произведенийыштымат сылнын лудын кертыт.
«Колумб лудмашыш» школышто, кыдалаш да кӱшыл профессионалле туныктыш, ешартыш шинчымашым пуышо тӧнежлаште тунемше ден туныктышо, поэзийым да мурым йӧратыше да йоҥгалтарыше кажне еҥ ушнен кертыт. Конкурс ийготым шотыш налын иктешлалтеш. 12 ияш марте, 12 гыч 16 ияш марте, 16 ияш гыч кугурак-влак коклаште сеҥыше-влак палемдалтыт.
«Сем» («Музыкальный») номинацийыште В.Колумбын почеламутшылан возымо муро-влакым йоҥгалтыт, тыгак автор-шамычын мурыштымат мураш лиеш.
Конкурсыш ушнышо-влаклан лудмыверыште верланыше Колумб пӧлемыште экскурсий эртаралтеш.
Сеҥышыш лекше-влак «Унчо – финн-угор тӱнян тӱвыра рӱдолаже» кышкарыште палемдыме «Колумб лудмаш» республик кӱкшытан конкурсышто шке вийыштым тергаш тӱҥалыт. Тудо Морко район Унчо селаште 9 июльышто эрта.
Марий тӱвыра рӱдер
