Эстон-влак Марий Эл дене палыме лийыт

Куд еҥан группо родо-тукым Эстон мланде гыч Марий кундемышкына унала толын. Нуно шочмо калыкнам, элнам сайрак палаш шонат.

Уна-влак Марий Элыш 3-шо кылмыште толын шуыныт да вич кече лияш шонат. Тӱшкаште улшо еҥ-влак шукыракшым туризм алан дене кылдалтыныт. Тыгак уло пушым пушеҥге гыч коплен ыштыше мастар да ТВ корреспондент. Тидын нерген мемнан сайтлан финн-угор чолгаеҥ Айвар Руукель увертарыш.

Айвар шке Фейсбукшо гоч уна-влак кушто лиймым фотосӱретышт-влак дене пеш раш, кумдан ончыкта.

Ушештарена А.Руукель шке Соомаа кундемжын пушеҥге гыч коплен ыштыме пушыжым — кудыжмым марла «тагына пуш», рушла «долбленка» маныт — ЮНЕСКО-н материалдыме тӱвыра поянлыкше коклаш пурташ тырша. Тыгай шонымаш дене тудо Эстон тӱвыра министерствыш лектын. Садлан Марий Элыштат тыгай пушым ыштен моштышо мастар-влак дене эн ончыч палыме лийын.

Турист-влак «Марий чодыра» паркым ончал савырненыт. Тошто Крешын ялыште лийыныт. Юлсер кундемыште Мӱшыл ер, чоҥалтше «Чоткар патыр» рӱдер дене палыме лийыныт. «Локама» ансамбльын мурмыжым колыштыныт.

Мутат уке, тыгак Йошкар-Олаш экскурсий дене коштыныт.

Группышто улшо Эстон TV3-ын корреспондентше Юку-Калле Райд чыла камерыш войза. Тудо шке телевиденийжлан путешествиже нерген кӱчык видосюжет-влакым ямдыла, кудыжым, векат, 19—23-шо ноябрьыште уверлаште ончыкташ тӱҥалыт.

Тыгак эстон уна-влак 2019-ше ийысе финн-угор рӱдыялыш Унчыш каят. Тушеч 8-ше кылмын мӧҥгӧ велыш тарванат.