Марий сылнымутчо Раисия Сунгурова «Кава вола копаш» шке у книгаж дене Таллинныште да Тартушто палдарен. Да эрла ты почеламут погынак Йошкар-Олаште презентацийже лиеш.
Эстонийын рӱдолаштыже шукерте огыл лекше савыктыш дене теле тылзын 15-ше кечынже Таллинн оласе тоштерын «Кик ин де Кӧк» башньыштыже эстон «Фенно-Угрийын» ий мучашысе мероприятийыштыже ойленыт. Поэтессе шке книгаж дене палдарен, почеламутышт-влакым марла лудын. Касым вӱдышӧ Йаак Прозес нуным эстоныш кусарен.
Ты касыштак шукерте огыл тӱням ужшо «Тошкалме тошкалтышем» эрвел марий-влакын калык мурышт CD дене палдареныт. Садлан Р.Сунгурован южо почеламутшо эстон Кристи Мӱхлиҥгын кӱсле да марий Инга Погонинан скрипке семже дене пырля йоҥген.
Тыгак Анна Мишина семсалмаште улшо муро-влакым шергылтарен. Гармоньым одо Павел Кутергин шоктен.
Мероприятийыште книгам сӧрастарыше сӱретче Иван Богомолов савыктышыште улшо сӱретышт-влак дене палдарен.
Эрлашыжым поэтессе да художник шке книгашт нерген Тарту марий-влак ушемын Изи Рошто-Шорыкйол-У ий пайремыштыже ойленыт.
Эрла, 21 декабрьыште, «Кава вола копаш» книган презентацийже Йошкар-Ола историй тоштерыште 18 шагатлан тӱҥалеш.
Тыге у савыктыш дене ончыч Эстонийыште палыме лийыныт, да вара книга дене Марий Элыште лишкырак палдарат.
Мероприятий гыч фотосӱрет-влак:
Алексей Алексеевын кас гыч видеожо:
MariUver
Фото да видео Иван Богомоловын
MariUver 