Тартушто марий мурызо Анна Мишинан да эстон кӱслезе Кристи Мӱхлиҥгын концертышт эртыш. Тудо вашке тӱням ужшо «Тошкалме тошкалтышем. Эрвел марий-влакын калык мурышт» CD дене палдарен.
Мероприятий эстон Родо-тукым кече-влак кышкарыште лийын. Ончылгоч концертым семсалман презентацийже семын эртараш шонымо улмаш. Но вучыдымын лекше йӧсылык-влаклан кӧра CD эше лектын шуктен огыл
Вашке Эстонийыште колшым уштымо кече шуэш — Чон кече (Hingede päev). Садлан кас кугезына-влакым шарныме мероприятий семын эртен. Тӱҥалтыште сортам чӱктымӧ да Анна «Колшым ужатыме мурым» мурен:
Концертыште шукыжым эрвел марий муро шергылтын. Южо мурыжо сем да мурымо йӧн дене калык муро деке лишыл лийын гын, южыжо йӧршын у семын йоҥген да кӱсле сем кугу верым налын. Адак кӱслем шоктышо кажне гана у семын шокта да импровизироватла.
Кум мурышто семым шокташ одо гармоньчо Павел Кутергин полшен.
Ик мурылан лач ты концертлан Татьяна Алыбина видеоклипым ыштен шуктен да шкак ончыктен.
Музык диск лектын шумеке, тыгаяк концерт эше Таллинныште эрта.
MariUver
Фото да видео авторын
MariUver 
Могай произношенийже тиде мутын — ку’сльэ але ку’слэ? И молан тьэ, марийвлак, марла чын да раш возымо шотышто изи реформа ваштареш улыда?