Марий Эл гыч «Куат» студент олаште уналатен

Шыжа тылзын 20-шо кечынже «Куат» марий группо Тартушто лийын да концертым ончыктен.

Тартуш уна-влак эрденымак толыныт. Нуным «Тарту марий-влак ушемын» чолгаеҥже Васли Николаев вашлийын. Организацийын пӧлемжым ончыктен.

Кечывал кочкыш деч вара ансамбльын еҥышт-влак Эстон калыкле музей дене палыме лийыныт.

Кастеным уна-влакым Тарту олан самырык-влаклан келыштарыме «Гениалист-влак клубышто» вученыт. Тушто 20 шагатлан Родо-тукым кас тӱҥалын.

Эн ончыч Марий Эл гыч уна-влак выступатленыт. Программе пеш поян да оҥай лийын. «Куат» марий калык семӱзгарым кучылтеш: иягомыж, гармонь, шӱвыр, шӱшпык, шиялтыш да тӱмыр. Тыгак группышто уло контрабас да гитар. Муро-влакым Марина Садова мура. Каласыман, марий калык семымат, автор муро-влакымат нуно у семын, оҥайын мурат да шоктат.

Садлан, ончаш толшо калык мӱндыр уна-влакым пеш шокшын вашлийын. Пытартыш номер — «Марий лӱм» муро — деч вара ончышо-влак ансамбльым сцене гыч колтен огытыл. Да эше ик мурым мураш йодыныт.

Вара сету «Ütsiotsõ» ансамбль калыкым куандарен.

Касын тӱҥ унаж-влакым — кечывалвел эстон выру диалект дене мурышо Мари Калькун ден саам рэпер Айло Валлем 10 шагатлан вученыт. Мари Калькун Эстонийыште пеш палыме мурызо, тудо кӱсле сем почеш да тыглаят эстон калык да шке мурыжым мура. Айло Валле саамла рэпым шергылтарен.