Марий Юмыйӱла ушемын Йошкар-Оласе общиныже 8 октябрьыште Йошкар-Ола воктенысе Тумер отышто шыже кумалтышым эртара.
Кодшо каныш кечылаште общинын еҥже-влак кумалтышлан у верым ойырен налыныт да тудым эрыктен, тӱзатен шынденыт.
Кумалтыш годым ик тулолмо дене Курык Кугызалан, Пиямбарлан да Ото юмылан пелешташ тӱҥалыт. Надыр шотеш кок тагам да шулдыраным пуат.
Кумалаш мийыше-шамычлан отыш пураш указатель-влак лийыт. Йолынат, машина денат пураш йӧн уло: Шернур кугорно деч заправке ваштареш асфальт корно кая.
Сӧрен мийыше-влак чеспелаклан шулдыраным (комбо, лудо) намиен кертыт. Пелен кинде сукырым, сортам, оксам да кӱмыж-совлам налман. Кумалтыш 8 шагатлан тӱҥалеш.
Шыже кумалтыш-влак тыгак моло верлаштат эртат:
5 октябрь — Советский район Кугунур ял кумалеш.
8 октябрь – Йошкар-Олаште шыже кумалтыш, Советский район Янгранур ял кумалтыш, Марий Турек Кирзавод дене Турек Суртанлан кумалеш, Советский район Опанассола ял кумалтыш.
15 октябрь – Оршанке район Аппак отышто мер кумалтыш.
22 октябрь – Шернур район Кугу Коклала отышто Кугу Тӱня кумалтыш да Параньга район Олор ял кумалтыш.
29 октябрь — Советский район Шуймучаш ялын Чокмото отышто Тӱня кумалтыш.
Марий Юмыйӱла ушемын КонтактЫште увертарымыж негызеш
MariUver
MariUver 