Таллинн тӱҥ кумдыкышто марий сем йоҥген

Etnolaat-2017_47Эстонийын рӱдолажын Ратуше площадьыштыже кодшо каныш кечылаште марий-влак дене лишкырак палыме лияш йӧн лийын.

Кажне ийын эртыше Этноярмиҥга теният кок кечым шуйнен — 23 да 24 сентябрьыште. Моло калыкле ушем-влак дене пырля Эстонийыште улшо кок марий организацият тушто шкеныштым ончыктеныт: Тарту марий-влак ушем да Таллин марий ушем.

Шуматкечын 12 шагатын кок мер ушем коло минуташ концерт программым ямдылен. Ончыч концертым вӱдышӧ Жанна Тохт таллиннзе да уна-влакым марла да эстонла саламлен. Концертым урал марий муро дене почмо. Анна Мишина мурен, Инга Погонина ия ковыжым шоктен.

Вара «Юмо аралыже шочмо элнам» кок йылме да йӱк дене йоҥген. Никас Ярушевичус ты мурышто семым кларнет дене шокташ полшен.

Кужэҥер да Торъял вел такмак-влакым гармонь сем почеш Виталий Рыбаков муралтен пуэн. Инга скрипкым шоктен, Анна тӱмырым пералтен.

Тений программыште курык марий сем да мурат лийыныт. Адак И. Погонина шкежат Кырык сир кундем вургем дене лийын.

Ончаш толшо-влаклан поснак марий вургеман йоча-влакын выступленийышт келшен. Ятыр еҥ фотосӱретым, видеом ыштен. Никас ден Джюгас Ярушевичус Татьяна Очееван «Кигик-когок» мурым муралтен пуэныт. Авашт, Инга Погонина, синтезатор дене семым шоктен.

Концертым Таллинн марий-влакын еш ансамбльышт Вячеслав Осиповын «Икыт, кокыт…» муро дене мучашлен. Кӱшнӧ ушештарыме еҥ-влак деч посна эше Людмила Ямурзина ӱдыржӧ дене лектын. Ж.Тохт кок йочаж дене лийын. В.Рыбаковынат кок эргыжым сценыште ужаш лийын.

Кок кече почела кок ушемын ӱстелыштыже марий сувенир, книга, DVD-влак ужалалтын. Икымше кечын И.Погонина марий поҥго шӱрым, шудо чайым темлен. Ж.Тохт кок кече почела пӧчыж когыльым, перемечым, подкогыльым ямдылен конден. Л.Ямурзинат шке перемчше дене сийлен. Н.Ярушевичус шке кидше дене Марий Элыште погымо тӱрлӧ эм шудым кагаз пакетлаш моторын возен, сӧрастарен вӱдыл ямдылен. Васли Николаев кокымшо кечын Урал марий шудо чайым темлен.

Рушарнян 14 шагатлан Туныктышо-влак пӧртыштӧ Эстонийысе изи калык-влакын форумышт тӱҥалын. Тушто ассоциацийым вуйлатыше Тимур Сейфуллен да вуйвер еҥ Наталия Ермаков организацийын сайтше негызеш ыштыме паша нерген ойленыт.

Тыгеракын Эстонийысе изи-калык-влак ассоциацийын черетан кугу пайремже эртен каен. Куанен каласыман кок кече почела игече мотор да кечан лийын.

Васли Николаев,
Тарту марий-влак ушемын вуйвержым вуйлатыше

Таллинн-Тарту

Фото да видео авторын

1 комментарий

Filed under Артикль-влак, Видео, Фото-влак

One response to “Таллинн тӱҥ кумдыкышто марий сем йоҥген

  1. Аноним

    Тау тыгай чапле репортажлан!

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход / Изменить )

Фотография Twitter

Для комментария используется ваша учётная запись Twitter. Выход / Изменить )

Фотография Facebook

Для комментария используется ваша учётная запись Facebook. Выход / Изменить )

Google+ photo

Для комментария используется ваша учётная запись Google+. Выход / Изменить )

Connecting to %s