Эстоний Эрыклык кечыжым палемда

Таче, 24 февральыште, Эстон Республикым ыштымылан 99 ий темын. Тидын шумлык эл мучко тӱрлӧ мероприятий-влак эртат.

Пайрем кече нӧлталтме годым 7:30 Таллинныште, Кужу Герман башньыште, кугыжаныш флагым нӧлталме дене тӱҥалын.

Вара 9 шагатлан рӱдолан Эрык кумдыкыштыжо Эрык верч кучедалме сарысе Сеҥымаш монумент деке пеледыш аршаш-влакым пыштыме церемоний лийын. Тушто Эстонийын премьер-министрже Юрий Ратас ойлен.

12 шагатыште кугу пайрем лӱмеш парад эртен. Тудым элын президентше Керсти Кальюлайд вашлийын, да парад дене генерал Рихо Террас командоватлен.

17 шагат гыч Эстоний опер да балет театрыште концерт эрта. 19 шагатлан туштак президент мужырын Эрыклык кече лӱмеш пайремле вашлиймашыже тӱҥалеш. Концертыш да приемыш 900 наре унам ӱжмӧ. Ты кок мероприятийым эртымышт годым вик Интернет йӧн дене ончаш лиеш.

Вес ий Эстон кугыжанышын кугу лӱмгечыже — 100 ий.

ERR-ын уверже-влак негызеш
MariUver