А.Йыкс да С.Каллас. Фото: err.ee
Таче, 24-ше сентябрьыште, Сайлыше-влак коллегий кок тапырыштат Эстонийын президентшым ойырен кертын огыл.
12 шагатлан «Эстоний» концерт залыш Сайлыше-влак коллегийын 335 еҥже гыч 334 погынен, ик еҥ черле лийын да толын кертын огыл.
Икымше тапырыште 5 кандидат лийын. Эстонийын консервативле партийже гыч Март Хельме 16 йӱкым поген, пеле руш — пеле эстон ончычсо йотоэл министр Марина Кальюранд — 75, Покшел партий гыч Майлис Репс — 79, вуйлатыше Реформо партий гыч Сийм Каллас — 81, адвокат Аллар Йыкс — 83.
Тыге кокымшо тапырыш эн шуко йӱкым погышо кок кандидат лектын: Сийм Каллас ден Аллар Йыкс. Но иктыжат пеле деч шукырак кӱлеш йӱкым поген кертын огыл. С.Каллас верч 138 еҥ йӱклен, Аллар Йыкс верч — 134. 57 бюллетеньыште нигӧм ончыктымо лийын огыл, кумытшым чын огыллан шотленыт.
Тыге элын президентшым сайлымаш угыч парламентыш — Рийгикогыш пӧртылеш. 14 кече жапыште парламент черетдыме заседанийышкыже погынышаш. Да тушто президентым сайлымаш угыч тӱҥалеш.
ERR, Интерфакс да ТАСС возымо негызеш
MariUver
MariUver 
Таче сентябрь, декабрь огыл.
Тау.