Эстоний президентым сайла

Идым тылзын 24-ше кечынже Сайлыше-влак коллегий Эстон мландын президентшым ойыраш тӱҥалеш. Парламент кӧ элын вуйлатышыже лиеш рашемден кертын огыл.

Такшым, Эстонийыште президентым верысе Кугыжаныш погын — Рийгикогу сайла. Тушто президентыш кандидатлан сеҥаш 101 депутат гыч 2/3 ужашыжын але 68 еҥын йӱкшӧ кӱлеш. Сайлымашын кум тапырыштыжат ик кандидатат тынар йӱкым поген кертын огыл.

Икымше этап 29 августышто эртен. Тунам 3 кандидат лийын. Социал-демократле партий деч Эйки Нестор верч 40 еҥ йӱклен, Покшел партий деч Майлис Репс — 26, IRL деч Аллар Йыкс — 25.

Кокымшо тапыр эрлашыжым 30-шо августышто эртен. Эн шуко йӱкым кок партий деч (Реформо партий да Социал-демократле партий) пырля лукмо кандидат Сийм Каллас поген – 45. Вара 32 йӱк дене Покшел партийын кандидатше Майлис Репсын лийын. Да IRL-ын еҥже Аллар Йыкс вер 21 еҥ йӱклен.

Кок эн шуко йӱкым погышо еҥ кумшо этапыш логалын. Туштыжо Сийм Каллас 42 йӱкым поген кертын, Майлис Репс — 26.

Тыге Эстон парламент кум тапырыштат президентым рашемден кертын огыл. Садлан элын вуйлатышыжым 24 сентябрьыште Сайлыше-влак коллегий ойыраш тӱҥалеш. Сайлыше-влак коллегий 101 Рийгикогу депутат да 234 верысе шкекучем еҥ гыч шога. Тушто президентыш кандидатлан сеҥаш пеле деч шукырак йӱкым погаш кӱлеш.

Палемдыман, Эстоний парламентан республик улеш, садлан президент кидыште пеш кугу власть уке. Тудо лач кугыжанышын символике сынан чурийже веле улеш.

MariUver

Покшел партий — эстонла Keskerakond, рушла Центристская партия

IRL — Isamaa ja Res Publica Liit, Ачамланде да Res Publica Ушем,
рушла Союз Отечества и Res Publica

Фотом «Postimees» газет гыч налме: Рийгикогушто президентым сайлымаш годым