Пургыж тылзын 17 кечыштыже Оршанке районысо марий-влакын конференцийышт эртен. Тушто шушаш Марий калык погыныш делегат-влакым сайленыт.
Конференцийым Виталий Кудрявцев вӱден.
Конференций тӱҥалтыште район онаеҥ Е.К.Аппаков мутым налын.
Погынымашыш Оньыжан алмаштышыже Алена Иванова толын. Тудо Мер Каҥаш ончылно шогышо тургыжландарыше йодыш-влак дене палдарыш. Тыгак Йошкар-Ола гыч кугу уна шочмо йылмым тунемме да аралыме нерген ойлыш.
Оршанке район деч Мер Каҥашын членже Виталий Кудрявцев отчётым ыштыш. Эн кугу мероприятийлан ӱмаште Тошто Крешын воктен Евгений да Арсий Волковмытлан пӧлеклалтше «Эҥер вӱд ӱмбалне» фестивальым шотлыман. Марий Янайым шарныме лӱмеш кугу пайрем эртаралтын. Мамич Бердейын чапкӱжӧ воктек ий еда калык шке онжым шарналташ погына. Майоров-Шкетанын тоштерже эреак шуко еҥым чумыра. Эртарыме Пеледыш пайремышкат у шӱлышым пуртымо.
Погынымашыште район чиновник-влакат лийыныт. Районысо депутат-влак Погынын председательже А.Л. Плотников, район администраций вуйлатышын алмаштышыже Л.С.Протасова, тыгак тӱвыра пӧлка гыч Алена Матвеева, туныктыш пӧлка гыч Галина Тоймакова лийыныт. Верысе чиновник-влак тӱвыра да туныктыш паша шотышто мутым кученыт. Мутат уке, паша ышталтеш. Но йодыш шуко: школышто марий йылме ситышын огеш пуалт, учебник огеш сите, увертарымаш оҥам марла чыла вере огыт кусаре, марий пӱртӱс тыгак лугалтеш…
Пытартыш йодыш почеш черетан Х Марий Погыныш делегат-влакым сайлыме. Тушко Г.А.Тоймакова, Н.А. Лежнина, М.И. Молотов, А.Н. Игошина ойыралтыныт.
Алексей Андреев
Материалым ямдылыме годым
26.02.2016 ий «Вперед» район газетым кучылтмо
MariUver 