«Юмарий» юмынйӱла школ виш лекцийыш ӱжеш

«Марий ушем» пелен 2015 ий декабрь тылзыште «Юмарий» юмынйӱла школ почылтын. Таче кече марте 3 урокым эртарыме. Самырык рвезе-влакым палыме онаеҥже-влак Йошкар-Ола гыч Тушнурцев Юрий-иза да Кужеҥер район гыч Актуганов Вячеслав туныктат.

«Юмарий» юмынйӱла школыш кызытеш 5-6 рвезе коштеш. Нуно онаеҥ-влакын каласкалымыштым колыштыт, йодыш-влакым пуэдат, ончыкшым йӱлам практически шукташ ямдылалтыт.

Ты школын программыже кызытеш июнь тылзе марте чоҥалтын:
– марий кумалтыш-влак кунам кузе эртаралтыт;
– марий юмо радам;
– кумалтышлан кузе ямдылалтман;
– отыш мийымеке, шкем кузе кучыман;
– марий йӱла почеш сӱаным кузе эртарыман да молат.

Шошым, Агавайрем кумалтыш жапыште, тунемше-влаклан «теркупшым чиктат». Тидыже ынде рвезе-влак онаеҥын полышкалышыжлан, учылан, тунем-ямдылалт шуыныт манмым ончыкта.

А 2016 ий 14 февральыште «Юмарий» юмынйӱла школ кумылан чыла марий-влакым «Марий юмынйӱла нерген» виш лекцийыш ӱжеш.

Лекций Йошкар-Олаште, Ленин проспект, 38-ше пӧрт, 305 пӧлемыште лиеш. 11.00 шагатлан тӱҥалеш.

«Марий ушемын» Увер-Рӱдерже