Теле тылзын 19 кечынже Эстонийын студент олаштыже Изи Рошто-Шорыкйол-У ий пайремым палемденыт.
«Тарту марий-влак ушемын» черетан тыгай пайремже, моло ийласе семынак, кок ужаш гыч шоген.
Икымше ужаш, йоча-влаклан кожпайрем программе, Литератур пӧртыштӧ эртен. Тудо заданийыштак «Тарту марий-влак ушем» мер организацийын шке пӧлемже уло. Андрей Албахтин ден Андрей Иванов пайремлан чодыра гыч свежа кожым конденыт да марий рушарня школ туныктышо-влак дене пырля залым моторын сӧрастарен шынденыт. Пырдыжеш школын илышыж нерген изирак фотоончер вераҥдыме лийын.
15 шагатлан пайрем программе тӱҥалын. Тудым организацийым вуйлатыше Васли Николаев почын да марий мер пашаште чолга улшо еҥ-шамычым шушаш Рошто, Шорыкйол да У ий пайрем-влак дене саламлен да пӧлекым кучыктен. Кӧлан Эстонийыште лекше «Родо-тукым кечышот», кӧлан Марий тӱвыра рӱдерын «Марий календарьжым 2016», южылан «Марий ушемын» Марла пырдыж кечышотшо пӧлек семын лийын. Тыгак ушемын ыштыме марла саламлымаш открыткым кучыктеныт.
Вара пайремыш толшо-влакым оҥай, весела да мотор У ий ёлко программе вучен. Тудым марий рушарня школын туныктышышт-влак Татьяна Албахтина ден Светлана Акельдина да школыш коштшо йоча-влак ямдыленыт. Нуно «Юзо пӧрт» йомакым модын ончыктеныт, марла У ий муро-влакым муреныт, тӱрлӧ модыш дене модыныт. Поснак чылалан «Лабада» мурен модмаш келшен.
Вара Йӱштӧ Кугыза толын, да йоча-влак тудлан почеламутым лудыныт, муреныт, Марита Шорникова фортепьяно дене шоктен пуен. Пайрем оза чыла йочалан пӧлекым кучыктен.
Тыгак пайремыш марий-влак коклаште коло ий миссионер семын пашам ыштыше Ану Вӓлиахо толын. Тудо мотор марий вургем дене лийын. Ану Рошто пайрем нерген каласкален, кок марла чоншӱлыш мурым чылалан пырля муралташ темлен. Тыгак А.Вӓлихо пеш шуко пӧлекым конден: кажне ешлан CD-комплектым кучыктен да ик яшлык чукырым ушемлан коден.
Мучашлан пайремыш толшо-влак ӱстел воктен чайым, кофем йӱын кутыралтен кертыныт.
Мероприятийын кокымшо ужашыже Пеплери 14 тӱшкагудо-хостельын саунан, каминан залыштыже эртен. Кумылан-влаклан ласкан гына мончаш пураш, марий семым колышташ да мутойым вашталташ йӧн лийын.
Тыгерак «Тарту марий-влак ушемын» Изи Рошто-Шорыкйол-У ий пайремже эртен каен. Пеш кугу тау пайремым ямдылыше рушарня школ туныктышо да тунемше-влаклан, ача-ава-влаклан полшымыштлан.
Васли Николаев,
«Тарту марий-влак ушем» вуйлатыше
Фото-влак В.Николаевын да Пӓртинмытын
MariUver 
Молодцы! пеш сай паша, ончен куанет! саламлем чыладамат! Тау!
Пуры ваы.
Цилäдäм Толшаш У доно! Цäшäн лидä!
Тау, Валери.
Тыйымат шушаш пайрем-влак дене саламлена. Тек У ий тылат чыла сайым гына конда.
Шергакан Тарту-Таллинн мари-влак! Чыладамат саламлем толын шушо у ий дене, чыла мари пайрем дене… Тазалыкым, еш пиалым, паша-тунемме лектышан лийышт.Чыладамат пагалем, кугешнем.У ийыште вашлийына ман шонем.
Тугай сай пайремым ыштен кертында — во! манаш веле кодеш.))) Ончашат весела,а тушто могай куан лийын — шоналташат йо:со:!