Финн-угор самырык-влак Эстонийыш погынат

29 июль гыч 1-ше август марте Эстонийыште Финн-угор калык-влак самырыктукым ассоциацийын (ФУКСА) конгрессше лиеш.

Погын кок вере эрта: Тартушто да Обиницыште. Уна-влак Эстонийын студент олашкыже эрла толаш тӱҥалыт. Ту кечын нуно Эстон калык музейын чоҥалтше у комплексше дене палыме лийыт. Да вара кастеным нунылан Тартушто улшо марий да одо мер ушем-влак нерген каласкалат.

XII конгрессын тӱҥ пашаже Тарту университетын Философий факультетшын пӧлемлаштыже эрта (Jaakobi 2).

29 июльышто ончыч толшо-влак регистрацийым эртат. Вара 10 шагатлан конгрессым почыт да пленарле заседаний лиеш. Кечывал деч вара самырык-влак секцийлаште пашам ыштат. Касвелеш Тарту ола мучко экскурсий эрта. 9 шагат кастене каныш кас вуча.

Эрлашыжым секцийлаште паша шуйна. Кастеным этнодискотеке лиеш.

31 июльышто 2016 ийысе финн-угор тӱвыра рӱдолам сайлаш тӱҥалыт. Касвелеш тенийысе тыгай столицыш, Кечывалвел Эстонийыште верланыше Обиница ялыш, тарванат. Тушто секцийлаште паша шуйна.

Эрлашыжым погын калык Обиница дене палыме лиеш да Сету королевствын кечыштыже участвоватла.

Тыге ФУКСА конгресс шке пашажым иктешла. Да кокымшо августышто уна-влак мӧҥгӧ велыш тарванат.

ФУКСА конгрессын радамже рушла (pdf) >>

ФУКСА конгресс Facebook-ышто >>

Погын нерген рушла «Фенно-Угрийын самырыкше-влак» ушемын лаштыкыштыже >>

MariUver

ФУКСА — МАФУН

© Тиде уверым тӱрысынек але тудын ужашыжым кучлтмо годым MariUver-ыш http://mariuver.com кылверым пуыман