Марий самырыктукым слет эртен каен

Samyryktukym_sljot2Пушеҥгын вийже – вожышто, калыкын – у тукымышто. Тиде ойышко келге шонымаш шыҥдаралтын. Арам огыл Россий кÿкшытан VII марий самырыктукым слётын темыже лач тыге йоҥген. Тудо 2015 ий 8-12 июльышто Марий Эл Республике Провой кундем Чакмарий школ пелен эртен. Тушко Марий Элын кажне гаяк районжо ден олаже, Виче, Одо, Пошкырт, Татарстан, Пермь кундемла, Моско ден Санкт-Петербург олала гыч 67 чолга еҥ ушнен.

Ты гана слёт Сеҥымашын 70 ияш лÿмгечыжлан да Сылнымут идалыклан пöлеклалтын. Тыгак самырыктукым вес ийын эртаралтшаш X Марий калык погын нергенат шарналтен.

Ныл кече шуйнышо тунемме да тÿвыра программе моткоч поян да тÿрлö шöрынан лийын. Тыгодым ныл лужа ныл виктыш почеш пашам ыштен. Тиде – «Мер толкын», «Еш илыш йÿла», «Сылнымутчо» да «Самырык этножурналист».

Ӱдыр-рвезе-влаклан ушеш кодшо лекций-влакым психологий науко кандидат, Югорск кугыжаныш университетысе педагогике да психологий кафедрын доцентше Нина Айварова лудын. Тудо пÿтынь слётлан лекцийым «пуэн» да посна занятий-влакым «Еш илыш йÿла» лужалан эртарен.

Марий Эл Республикысе тÿвыра, печать да калык-влакын пашашт шотышто минстерствыште калыкле да конфессий-влак кокласе кыл пöлкам вуйлатыше Игорь Садовин тÿшка лекцийым лудын, «Мер толкын» да «Самырык этножурналист» лужа-влак дене посна вашлийын.

Сылнымутчо-влак верысе да Йошкар-Ола гыч толшо писатель-влак дене мутланеныт. Нунылан мастар-класс-влакым Светлана Бессонова, Аркадий Богданов, Валерий Григорьев, Валентина Изилянова, Юрий Соловьёв, Татьяна Пчёлкина, Елена Юсупова эртареныт.

Этножурналист-влак деке Озаҥ федерал университетысе электрон СМИ теорий да практике кафедрын доцентше Руслан Бушков ден фотограф Владимир Кравцов толын коштыныт, пайдале занятий-влакым эртареныт. Звениго районысо «Звениговская неделя» газет редакций пашаеҥ-влак денат вашлиймаш кÿлешан лийын.

Тыгак РФ калык-влак кокласе журналистике гильдийым вуйлатыше Маргарита Лянге дене ушеш кодшо семинар эртен. Палемдыман, тудын дене пырля слётын пашашкыже Российын 9 олаже — Барнаул, Иркутск, Йошкар-Ола, Красноярск, Москва, Новосибирск, Саранск, Северодвинск да Сыктывкар — гыч самырык ден опытан журналист-влак ушненыт.

Моло унат ятыр толын коштын: Марий Оньыжа, Кугыжаныш Погын вуйлатышын алмаштышыже Анатолий Иванов, Марий Эл Республикысе тÿвыра, печать да калык-влакын пашашт шотышто министрын икымше алмаштышыже Владимир Актанаев, тиде министрынак вес алмаштышыже Галина Ширяева, Марий Эл Республикысе туныктымаш да шанче министрын алмаштышыже Энзе Идиатуллина, Звенигово район вуйлатыше Владимир Геронтьев, Марий Элын тÿҥ онаеҥже Александр Таныгин да молат.

Марий самырыктукым слётыш толшо-влак Звенигово ола дене палыме лийыныт. Калык кидмастар пöртыштö, тоштерыште лийыныт, олам ончал савырненыт да Юл вÿдыштö капым кандареныт.

А кидмастар кружоклаште тÿрлаш, шун да пу гыч модышым ышташ тунемыныт.

Эрдене — эр зарядке, кечывалым — тунеммаш, вашлиймаш, кастене – этнодискотеке, изи тул йыр чумырген мутланымаш. Чыла тиде слёт годым самырыктукымым иктеш чумырен. Патриот кумылымат шуараш ятыр ышталтын. Теве ик кастене Кугу Ачамланде сарыште лийше-влаклан пöлеклалтше мемориал воктене шарнымаш кас эртыше да эрык илышым аралаш кÿлмö нерген шонаш таратен. Тиде касым «Сылнымутчо» лужа эртарен.

«Мер толкын» лужан иктешлыше пашаже «Марий калык погын» лийын. Тунам шке коклаштышт Марий Оньыжамат ойыреныт. Тиде кугу сомылым Игорь Эштуковлан ÿшаненыт. Тыгак Мер Каҥашыш темлалт кертше еҥ-влакым палемденыт, резолюцийымат пеҥгыдемденыт.

Слёт кышкарыште кок выставке лийын. «Пушеҥгын вийже» выставкым Озаҥ ола гыч фотограф Владимир Кравцев ончаш темлен. Весыжым РФ калык-влак кокласе журналистике гильдий конден.

Марий самырыктукымын VII слётшо «Этношÿлыш» фестиваль дене иктешлалтын. Тушто марий, татар, чуваш муро-влак йоҥгеныт, тÿрлö семын куштеныт. Слётыш толшо-влак шке мастарлыкыштым ончыктеныт. Мутлан, самырык этножурналист-влак сценкым, слёт нерген видеоматериалым ончыктеныт.

Тыгай кÿжгö пашам ворандарен колташ куштылго огыл. Но организатор-влак шке шонымашышкышт шуыныт. Кугу таум каласыме шуэш посна еҥ-влаклан. Эн очычак, Чакмарий школын вуйлатышыже Владимир Кашковлан. Тудо мемнан пашанам виктараш чыла йöным ыштен. Пытартышлан фейерверк денат куандарен.

Пашаче группылан – Марий Оньыжан алмаштышыже Алёна Ивановалан, Мер Канашын еҥже, Марий калык конгрессым вуйлатыше Эдуард Александровлан, Марий Эл Республикысе тÿвыра, печать да калык-влакын пашашт шотышто минстерствыште калыкле да конфессий-влак кокласе кыл пöлкам вуйлатыше Игорь Садовинлан, Марий Эл Республикысе туныктымаш да шанче министерствын пашаеҥже Маргарита Малановалан, Югорск кугыжаныш университетысе педагогике да психологий кафедрын доцентше Нина Айваровалан, Марий тÿвыра рÿдерын пашаеҥже Галина Ласточкиналан, «Поэзий шепкаште» сылнымут клубым вуйлатыше Татьяна Светлаковалан – кугу тау. Тыгак верысе администрацийлан, оргкомитетлан, туныктышо, писатель, журналист да слётым эртарымашке надырым пыштыше моло чолга еҥланат. Лужавуй-влаклан — Наталья Кошкиналан, Снежана Богдановалан, Татьяна Япаевалан да Максим Алгайкинлан.

Палемдыман, «Самырык этножурналист» виктыш «Самырык этножурналист школ» проектым шуен. Тидым ышташ М.А.Кастрен Общество полшен.

Марий самырыктукымын Россий кӱкшытан VII слётшым ворандарыше да эртарыше организаций-влак: «ИНТЕЛЛЕКТУАЛ» тӱвыра-увер рӱдер, Марий калык конгресс, Звенигово муниципал район, Чакмарий кыдалаш школ.

Учредитель-влак: Марий Эл Республикысе тӱвыра, печать да калык-влакын пашашт шотышто министерстве, Туныктымаш да шанче министерстве, Мер Каҥаш. Проект «2013 — 2020 ийлан Марий Эл Республикысе кугыжаныш калыкле политике» республикысе программе кӱшеш илышыш пурталтын.

РЕГИОН 12 слет нерген видеосюжетше:

Эльвира Куклина

Налмывер: Арслан

Фото: Надюсик Ильина ВКонтакте

Оставьте комментарий

Filed under Артикль-влак, Видео

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход / Изменить )

Фотография Twitter

Для комментария используется ваша учётная запись Twitter. Выход / Изменить )

Фотография Facebook

Для комментария используется ваша учётная запись Facebook. Выход / Изменить )

Google+ photo

Для комментария используется ваша учётная запись Google+. Выход / Изменить )

Connecting to %s