«Кидшер» ӹнде кырык марла шайыштеш

Kidsher_kmСӓмӹрӹквлӓн «Кидшер» интернет журналышты 1 июль гыц кырыкмарла вкладка пачылтеш.

— Кырык мары «Кидшер» – тидӹ у проект, кышкы сирен кердыт цилӓн, кӱ кырык марла ынгыла, — редактор Ольга Кузьмина шайыштеш. — Тиштӹ увервлӓм, интервьювлӓм культура дӓ искусствы ядмашвлӓм, образовани дӓ воспитани гишан сираш тӹнгӓлӹнӓ. Шанымашыштына ти проект лыдшывлӓн келшӓ лиеш.

Ӓшӹндӓрӹктенӓ, Интернет-журнал марла халыкын ӹлӹмӓшӹжӹ культурыжы, религи гишӓн шайыштеш. «Кидшерым» руш дӓ алыкмары йӹлмӹвӓ донат лыдаш лиеш. Цилӓ страницывлӓшты шукы йиш керӓл информацим улы. Тагачшы кечеш сайтышты куд эдем пӓшӓлӓ.

— Мары ылмына доно когешнена, культурынам, йӹлмӹнӓм цилӓнӓт анзылташ цаценӓ дӓ у страницым пачмыланна пиш сусу ылына. – сайтын тӹнг редакторжы Николай Любимов шайыштеш. – Журналышты сакой йиш акцивлӓ, конкурсвлӓ, мадмашвлӓ дӓ концертвлӓ эртӓрӓлтӹт. Тумайымаштына, ти площадкышты у шанымашвлӓ, проектвлӓ шачаш тынгӓлӹт дӓ вес сӓндӓлӹк гӹцӹнӓт халык кырык сирӹштӹш увервлӓм лыдын кердеш лиеш.

Налмывер: Кидшер

2 комментария

Filed under Увер-влак

2 responses to “«Кидшер» ӹнде кырык марла шайыштеш

  1. Пуры вады.

    Пиш яжо пӓшӓ ӹштӓлтеш.
    Сек пӹтӓрижок кырык мары йӹлмӹ гишӓн ӹшке, кырык, кожла дӓ вӹтлӓмарывлӓ шанышашлык ылына. Туан йӹлмӹлӓнӓ, кӹзӹтшӹ жепӹн, интернетӹштӹ сирӓш, нимахань нелӹц уке. Сирӓш кымылна веле лижӹ. Активист яжо ядмашым пуа: малын Кырык мары Администрацин сайтшым кырык марла сирӓш агыл? Тенге каеш: трибунывлӓ гӹц туан йӹлмӹнӓжӹм чоте яратена ылнежӹ, а лачокшым, кок кым предложеним прамой кӹлден ана мышты. Кыце поэт Ондрин Валька манеш: халыкланна кырык мары йӹлмӹ доно ликбезӹм эртӓрӓш веле кодын. Ти ликбез курсым район Администраци гӹц агыл вӓл тӹнгӓлӓш?

    • olmasad

      Халашты – Масленица, а солашты Ӱӓрня лижӹ!

      Ӱӓрня эртӓ гӹнь, шошымым вӓшлинӓ, техень кечӹ 6 мартын ыльы. Празньыклан келшӹшӹ игечӹ ирокок шалгыш – йӓнг ӹвӹртӓ. Кыце техень сӹлнӹ кечӹн тоны шӹнзӓш лиэш?!
      Эмӓн сола Культура томан пӓшӓзӹвлӓ Ӱӓрням ыжатымы айошкы халыкым погенӹт. Изиге-когоге ДК анзылны шалген кеӓт. Кымылым лӱктӹшӹ рушла-марла мырывлӓ йонгалтыт. Празньык программым видӹшӹ Татьяна Минеева погынышывлӓм куштымашкы, мадмашкы цымырен миӓ, шукыжок тӹдӹм школышты тыменьшӹвлӓ колыштыт. Изирӓк тетявлӓ сага ӓтя-ӓвӓвлӓ кайыт, ыныкавлӓ сага папивлӓштӓт йӹрвӓш шагал куштат, лапам шит. Кыргыжталмы, тӹргештӹлмӹ мадмашвлӓ Ӱӓрня Ӹдӹр йӹр ылевӹ, шукы сусум толшывлӓлӓн ӹштевӹ. Кӱ сӹнгӹшӹшкӹ лӓктӹн, тӹдӹвлӓлӓн шокшы меленӓм кычыктевӹ.
      Халык лишнӹ меленӓ пыш йӹрвӓш шӓрлӹш, самовар гӹц шокшы чӓй йогыш, яргата пеледӹшӓн савыцвлӓ айо цӹрем пыртевӹ.
      Кого таум тотлы шокшы меленӓлӓн, сусу айолан тӹдӹм цымырышы Зинаида Милюковалан, Ираида Ихонькиналан, Галина Суворовалан, Татьяна Минеевалан дӓ Надежда Седовалан келесӹшнӓ. Празньык яжон, веселӓн эртӓрӹмӹ, но ик акситӹм пӓлдӹртӹмӹлӓ: руш йӹлмӹ доно тек халавлӓштӹ Масленицӹм ӹштӓт.
      Ӱӓрнян шӹмшӹ кечӹжӹ – икӹжӓк-иктӹ гӹц простьымым ядмы кечӹ, 7 март гӹц Кого пост тӹнгӓлӓлтӹн.

      Тенге кырык марла ирен сирӓш келеш!

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s