«Пеледыш пайрем» — регион-влак кокласе калык пайрем 20 июньышто Йошкар-Олаште эртаралтеш. Тушко 7 кундем гыч марий делегаций толшаш.
Калык пайрем 9.00 шагатлан Пӱнчер отын Тумо аланыштыже марий йӱла почеш Агавайрем дене тӱҥалеш.
11.00 шагатлан «Кудо» конкурс тӱвыра да каныме Рӱдӧ паркын тӱҥ аллейыштыже пашажым почеш. Тыштак кидмастар-влакын ончыкташ да ужалаш лукмо ӱзгарыштым налаш лиеш.
11.30 шагатлан Ленин лӱмеш тӱвыра полат ончылно Палантай лӱмеш культур да сымыктыш колледжын да Ленин лӱмеш тӱвыра полатын усталык коллектив-влакышт шке мастарлыкыштым ончыктат.
12.00 шагатлан тышке Российысе регионла, Йошкар-Оласе да Марий Эл Республикысе районла гыч усталык коллектив-влак, мер организаций да калыкле-культур ушем-влакын еҥышт чумыргат.
Регионгокласе калык айом пайремлын почмо церемоний 13.00 шагатлан Ленин лӱмеш кумдыкышто тӱҥалеш. 14.00 шагатлан пайремыш толшо-влак тӱвыра да каныме Рӱдо паркыште Республикысе да Россий кундем фольклор коллектив-влакын программыштым ончен кертыт.
Кеҥеж эстраде площадкыште 14.30 шагатлан йоча-влаклан «Модыш алан» почылтеш. Тыштак «Пеледыш аршаш» — йоча марий вургем пайремыш ушнен кертыда. Эртарыше-влак пайремыш ургызо, кидмастар, тӱрлызӧ-влакым ушнаш йодыт. Тиде жапыштак Спорт аланыште кучедалмаш, кирым да пундышым нӧлтымаш, пу сорымым пӱчмаш тӱҥалеш.
15.00 шагатлан Сеҥымашлан XXX ий темме лӱмеш тӱвыра полат ончылно «Кушталтен, каналтена» фольк-шоу да «Марий кас» ӱжыт. Такмак, уста тӱмырзӧ да гармоньчо-влак таҥасымаш эрташ тӱҥалыт.
«Саскавий» марий ӱдырамаш ушем 15.30 «Мелна пайремыш» марий кочкышым ышташ йӧратыше да тудлан акым пуэн моштышо-влакым ӱжеш.
18.00 шагатлан «Пеледыш пайрем» Ленин лӱмеш кумдыкышто шуйна. Ончыч «Йыр куштымаш» фестиваль почылтеш, вара 19.00 шагатлан марий шӱдыр-влак дене пырля концерт-дискотеке тарвана.
Калык пайремым Марий Эл Республикын тӱвыра, печать да калык-влакын пашашт шотышто министерстве, Марий Эл Республикын ялозанлык, кочкышвундо да пӱртӱс поянлыкым кучылтмо шотышто министерстве да Мер Каҥаш эртараш пунчалыныт.
Тӱвыт пашам Республикысе марий тӱвыра рӱдер, Марий Эл Республикысе И.С.Палантай лӱмеш тӱвыра да сымыктыш колледж, Марий Эл Радио, Йошкар-Оласе культур виктем, «Саскавий» марий ӱдырамаш ушем шуктен шогаш тӱҥалыт.
Марий тӱвыра рӱдерын возымыж негызеш
MariUver
Налмывер: Марий тӱвыра рӱдерын лаштыкше
MariUver 