Эстон фестивальыште марий-влакат лийыныт

Вӱдшор тылзын 24-25 кечынже Эстонийын Тарту олаштыже эртыше Изи калык-влак III фестивальыште верысе марий-влакат участвоватленыт.

Икымше кечын, 24 апрельыште, ончер-валкым почыныт да йыргешке ӱстел эртен. Пайрем почамште да йыр шинчен мутланымаште олам вуйлатышын полышкалыжыже Тийа Теппанат лийын.

11:30 йоча-влак ужашыште Марий рушарня школ дене палдареныт. Эдвин Матвеев «Шошо толын, шошо» почеламутым лудын пуэн. Марита Шорникова фортепьяно шоктымо почеш «Ава кумыл» да фонограмме сем дене «Антошка» муро-влакым марла муралтен. Лиза Салмиянова флейте дене «Чеверынат, чеверын» мурын семжым йоҥгалтарен. Мучаште йоча, туныктышо да ача-ава-влак «Тошто марий куштымашым» ончыктеныт. Программым школ туныктышо Татьяна Албахтина ден Светлана Акельдина ямдыленыт, нунылан ача-ава-влак полшеныт.

Йоча фильм программыште «Шонанпыл» 02.08.2015 марий передачым ончыктеныт. Тушто ӱмаште Шернурышто эртыше «Изи мӧр пеледыш» пайрем нерген ойлалтеш. Кугу-влаклан кино радамыште Алена Иванован «Кугу корка але Виче кундемын пӱрымашыже» видеочерк лийын.

Пайремыште тыгак марий кочкышымат тамлен ончаш лийын. Перемечым Т.Албахтина ыштен, мелнам — С.Акельдина, шыл да пареҥге когыльым Надежда Сидоркина кӱэшт конден.

Кастеным родо-тукым блокышто одо да ингерманланд-влак дене пырля, «Марий кумыл» ансамблят ныл номерым ончыктен. Тӱҥалтышыште Анна Мишина кок тошто калык мурым муралтен пуэн, вара Елена Ласточкинан дене пырля — «Пӱтыральым — рончалте» мурым. Мучашлан тӱшкан «Муро, муро» почеш кушталтеныт.

Тыге ынде кокымшо ий Тартушто илыше марий-влак Изи калык-влак фестивальыште шкеныштым ончыктат.