У ий дене!
У шонымаш да сеҥымаш дене, пагалыме марий калык!
Регионысо «Марий ушем» («Союз мари») мер организаций тендам чыландамат 2015 ий дене саламла да шочмо калыкнам вияҥдымаште чоткыдо лектышым тылана.
2015 ий – «Марий ушемлан» тыглай идалык гына огыл. Тений, Совет жапыште (1918 ийыште) марий ушемым чарыме деч вара ятыр жап эртымеке, ушемнан угыч ылыжмыжлан 7-8 апрельыште 25 ий – чырык курым – темеш.
Тыгодымак палемдена: власть вашталтмылан кӧра ожнат тӧченыт, кызытат тӧчат гынат, «Марий ушем» илен да ила! Амалже кажныланна раш – ила марий калык, да садланак тудын ик эн тошто да ик эн мунло организацийже ила, шӱла, ыштышаш сомылжым шуктенак толеш.
2017 ийыште «Марий ушем» 100 ияш лӱмгечыжым пайремлаш тӱҥалеш. Садланак ӱшандарен каласена: ушемна таче утларак чак да иктура чумырга, чыла сомылжым рашын палемда, кок ий жапыште тидым шукташ вийым чаманыде тачак пижын.
У ий водын «Марий ушемын» членже-влаклан икымше увертарымашнам колтена: 2015 ий 24 январьыште отчет-сайлымаш конференций лиеш. Тачысе кечылан организацийыштына 70 утла еҥ ончыл радамыште – икымше тӱшкаште – да икмыняр шӱдӧ – кокымшо полшышо радамыште шогат — шотлалтеш. 2011 ий январь тылзыште Юстиций министерствын пеҥгыдемдыме у Уставнан йодмыж почеш, кажныже ушемышкына йодмашым возен пурышаш. Чаманаш гына кодеш, илыш саман тӧрсырлан кӧра 2010 ий гыч «Марий ушемышкына» угыч пурышо-влак кокла гычын таче шагалын огыл ӧрдыж велке пашам ышташ я тунемаш каеныт. Лишылрак-влакше конференцийыш толытак манын ӱшанена.
Ончышаш йодышна-влак (нуно ешаралт але икмыняр вашталт кертыт):
– «Марий ушем» РОО-н 2013–2015 ий жапысе сомылжым иктешлымаш. Отчётым вуйлатыше Евгений Чашкин ышта;
– отчётым каҥашымаш;
– «Марий ушемын» вуйлатышыжым сайлымаш;
– тергыше комиссийым сайлымаш;
– 2015 ийлан паша планым пеҥгыдемдымаш;
– верлаште пӧлка-влакым (тыгак Российын икмыняр кундемыштыжат) почедыме йодыш;
– «У марий чаҥ» газетын тӱҥ редакторжым пеҥгыдемдымаш;
– тӱрлӧ.
Отчёт-сайлымаш конференций 24 январьыште 11 шагатлан тӱҥалеш да 14 шагат марте шуйна. Варажым кечывалкочкыш. Эртарыме вер ешарен увертаралтеш. Йодышым +7-902-671-99-65 телефон дене рашемдаш лиеш.
«Марий ушемын» еҥже-влак деке ӱжмаш.
Эн ончыч, пытартыш вич ий жапыште йодмаш дене пурышо-влак деке:
– чыладамат тиде жаплан Йошкар-Олашке вучена;
– кӧ 2014, 2015 ийлан надырым тӱлен шуктен огыл гын, ик идалыклан 300 теҥгем пыштыман;
– йодмашым возымо деч вара Сургут, Ямал, Питер але Суоми да Эстоний гыч кӧ толын ок керт гын, тыланда электрон почто полшымо дене «мемнан дене пырля лияш, каҥашаш да йӱклаш» йӧным ыштена;
– «Скайп» йӧнна лачеш толеш гын, погынымашнан икмыняр ужашыжым видео-конференций йӧн почеш эртарена;
– темлымаш да йодыш-влакым ончылгоч тыгак evgenychashkin@mail.ru laid@nm.ru электрон почто ден увертараш йодына.
«Марий ушемын» 1990-2010 ийласе (регистрацийым эртыдыме) чолгаеҥже-влак деке ӱжмаш:
– ме тендам лишыл жапыште «Марий ушем» радамыш пураш ӱжына – тидын дене те шочмо марий калыкланна полшаш кумылым ончыктеда;
– тидлан нимо кугунжо ок кӱл – кылым муын, мемнан деке йыҥгыртен, вашлияш;
– вес йӧн – таче электрон почто дене (писын ышташ кӱлмӧ годым) шуко йодышым илышыш пуртен кертына; тыгак тидын гоч йодмашымат пуаш да «Марий ушемын» членже лияш лиеш;
«Марий ушем» вуйвер увертара – «Марий ушем» мер организаций Устав почеш тыгай еҥ-влакым шке еҥжылан ок шотло але ок нал:
– кӧ «Марий ушемын» чапшым шӱктарымаште участвоватлен (историй факт почеш);
– кӧ неле 2002–2010 ийлаште «Марий ушемым» кудалтен, «Марий ушемлан» ваштарешла шогалше вес мер организацийыш куснен (факт почеш);
– кӧ «Марий ушемын» Уставшым шуко гана пудыртылын;
– кӧ пытартыш жапыште «Марий ушемын» сомылжо деч кораҥын;
– тыгодымак 2015 ийым «Марий ушем» мер организаций сырыме деч вара икте-весе коклаште чын кӱшеш сӧрасымаш идалык семынат увертара.
Эше ик гана У ий дене!
2015 ийыште паша лектышна шинчалан перныше лийже манын тыршаш тӱҥалына. Чын паша лектыш дене «Марий ушемын» сайтшым ыштен, тушан «Марий ушемын» 100 ий жапыште эртыме корныж нерген тӱрыс материалым чумырен савыктен шогаш. 2015 ийым «Марий ушемлан» – 100 ий» документ да материал-влак книгам ямдылыме идалык семын палемдаш.
Регионысо «Марий ушем» мер организацийын вуйверже
Йошкар-Ола
2014 ий 29 декабрь
MariUver 