Кум ий шуйнышо проект илышыш шыҥдаралтын! «Зоя Дудина: Кум томан ойпого» савыктыш ош тӱням ужын.
Икымше том «Куанышым куэм ӧндал»: поэзий. 2012 ийыште Марий Эл Республикысе тӱвыра, печать да национальность паша шотышто министерствын савыктыме шотышто программыж почеш печатлалтын.
Куанышым куэм ӧндал,
Ваштар дек толын воштыльым,
Писештым пистерем ончал,
Шопкер пелен мый шойыштым…
Кокымшо том «Шийгорнышто»: очерк-влак. Тений кеҥежым М.А.Кастрен ушемын окса полышыж дене савыкталтын.
Ошкылам шийгорно дене,
Мутланем ош тылзе дене.
Мланде ден кава коклаште,
Илыш ден азал лоҥгаште
Мый улам пырт нойышо,
Кӧргӧ чон ден пойышо,
Мый улам шийгорнышто,
Юмын ӱжмӧ олмышто…
Кумшо том «Чӱчалтыш ӱшан»: кусарыме сылнымут. У ий вашеш лудшем-влакын окса полышышт дене савыкталтын.
Кусарыме пушеҥгыла,
Шыпак шывыртатен
Кусарышым мый еҥыным,
Марла шымартарен.
Родемын сылне нурышто
Мый тарзе гай улам.
Но йӧратен лай мурыжым,
Тӧра гай шкем шижам.
Тӧра да тарзе сапыште
Мылам илаш келша.
Чон рӱдӧ тугмо жапыште
Йот мут илаш полша.
Зоя Дудина
www.zojadudina.ru
MariUver 
Висле ий илалалтын — кум том возалтын. Пеш сай! Тыланем еще кум томлан вий, ой, кумыл ситыже. Поэт да писательна-влаклан ты пашашт куаным да чыла ситымашым пуэн шогыжо!
Изи чотан калыкемлан, изи капан ӱдырамаш-влак шуҥгалташ огыт пу.
У Ий дене, у сеҥымаш дене !