Тарту марий-влак эртыше ийым марла иктешленыт

Пайрем вӱдышӧ Татьяна АлбахтинаТеле тылзын 14 кечынже Тартушто илыше марий-влак Изи Рошто-Шорыкйол-У ий пайремым марла эртарен колтышт. Тыгак эртыше ийым иктешлыме.

Йоча-влаклан У ий программе 15 шагатлан Литератур пӧртыштӧ тӱҥалын. Пайремым Татьяна Албахтина ден Светлана Акельдина вӱденыт. Марий рушарня школышто тунемше-влак «Лӱдшӧ мераҥ» йомакым модын ончыктеныт. Кок командылан шелалтын, пайремыш толшо-влак тӱрлӧ модышлаште шке вуй уш писылык, чолгалыкыштым ончыктеныт да таҥасеныт.

Чылан кидым кучен кож йыр пӧрдын у ий муро-влакым марла мурымо.

Вара Йӱштӧ Кугыза толын, да кажне йоча тудлан ончылгоч ямдылыме почеламутым лудын але иктаж вес номерым ончыктен пуэн. Теле оза чылаштлан пӧлекым кучыктен. Тыгак йоча-влакын ыштыме кидпаша конкурсым иктешлыме, сеҥышыш Марита Шорникова лектын.

У ий кож программе деч вара чылаштым пайрем ӱстел вучен. Толшо-влак йӱын-кочкын, модын юарлен, марий семым колыштын, икте-весе дене кутыралтен касым умбакыже шуэныт.

Пайрем программым тений шыжым да телым марий рушарня школышто туныктышо-влак, Т.Албахтина ден С.Акельдина, ямдыленыт, эртареныт, залым сӧрастареныт. Мутат уке, нунылан ача-ава да йоча-влакат полшеныт. Пӧлек-влаклан оксам ача-ава-влак деч Танян ден Светак погеныт. Пайрем ӱстелымат тӱшка вий дене чумырен шаренна.

Кастеным кумылан-влак Пеплери 14 тӱшкагудын мончан, каминан залыштыже жапым эртарен кертыныт. Ончыч Тарту Марий-влак Ушемын  погынымашыже эртен. Организацийым вуйлатыше Васли Николаевын ойжо почеш эртыше ий сай лектышан лийын. Ушемна Тарту изи калык-влак фестивальыште марий кочкышым, концерт программым ончыктен. Тыгак марий-влак нерген Парижыште, Ригыште ойлымо, марий мурымаш-куштымаш дене палдарыме. Таллинныште ярмиҥгаште кокымшо ий участвоватлена. «Марий ушем» ден «ВийАр-Рӱдерлан» «Умбалне Элнет ӱмбал канде» нотан муро погым лукташ полшенна да моло сомылат шукталтын.

Ушемна пелен кокымшо ий Марий рушарня школ пашам ыштен. Йоча-влаклан арняш ик гана 2 шагат марий йылме да 2 шагат музык, культур урок эртаралтын. Школым ончыч Валентина Семенова ден Анна Мишина вӱденыт. Тений шыже гыч — С.Акельдина ден Т.Албахтина. Погынымаште школым умбакыже посна лукташ да аттестоватлаш темлыме.

В. Николаев ушемын чолгаеҥже-влакым тауштен да нунылан Лайд Шемйэрын (Владимир Козловын) колтымо марла календарь-влакым да муро погым кучыктен. «Марий талешке Чумбылат» кечышотым Лайд шукерте огыл эше ешарен колтен ыле, тудыжо Таллинн марий-влаклан кодеш.

Погынымаш деч вара ласкан мончаш пурен, икте-весе дене ойласен, марий семым колышт шинчаш йӧн лийын.

Мучашыште Тарту Литератур пӧртым тауштынена ыле. Нуно эре мемнан ушемым умылаш тыршеныт: оксана уке гынат, пӧлемна гыч поктен луктын огытыл, тыгак ты пайрем эртарашат зал-влакым яра пуэныт. Эстонийысе изи калык-влак ассоциацийлан Пеплери 14-ын каныме пӧлемже верч счётым тӱлымыжлан таум ойлена.

Васли Николаев,
Тарту марий-влак ушемым вуйлатыше

4 комментария

Filed under Артикль-влак, Йоча-влаклан

4 responses to “Тарту марий-влак эртыше ийым марла иктешленыт

  1. Сопрон

    Молодечак улыда, лектыш сай, ий арам эртен огыл. Пашада умбакыжат ушнен шогыжо!

  2. Лайд

    Поро!
    Кеҥежлан Марий Элыш коча-ковашт деке утларак жаплан конден кодыза. Ида лӱд, нуно марий коклаштат европеецак кодыт.
    Но лийын кертеш вес семынат: мутлан, Малмыж оласе черке священник Кузнецов шке Стефан эргыжым Малмыж ола гыч Марий Малмыж селашке кеҥежлан намиен кода улмаш. Стефан тушто марий коклаште Стопаныш савырнен. Ончычшо, тиде Стефанет марий-лакым пешыжак йӧратен огыл. Эсогыл шке тӱҥалтыш шымлымаш пашажлаштыже игылтмашымат шуко кучылтын…
    Но илыш ӱмыр мучашке лишемме семын тиде Стефан марий улмыжым умылаш да марий улмыжым чот пеҥгыдемден. “Мый марий улам!” манын кычкырал колтен огыл гынат, тидыже кажне пытартыш пашажлаштыже шижалтын.
    Тыге шочын-савырнен XIX курымын кокымшо пелыштыже кугу марий этнограф Степан Кирович Кузнецов (1854-1913).
    XX курымыштат марий этнографийым шымлыме шотышто тудым иктат эртен каен огыл.
    Илыш пӱрымаш…

    • Васли Николаев

      Пеш чын возет, Лайд.
      Тыгак эше ача-ава-влаклан ешыште йочашт дене марла кутыраш кӱлеш. Лач арняш ик гана рушарня школыш гына конден, йочам марла ойлышым ышташ ок лий…

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google+ photo

Для комментария используется ваша учётная запись Google+. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s