Тарту марий-влак эртыше ийым марла иктешленыт

Теле тылзын 14 кечынже Тартушто илыше марий-влак Изи Рошто-Шорыкйол-У ий пайремым марла эртарен колтышт. Тыгак эртыше ийым иктешлыме.

Йоча-влаклан У ий программе 15 шагатлан Литератур пӧртыштӧ тӱҥалын. Пайремым Татьяна Албахтина ден Светлана Акельдина вӱденыт. Марий рушарня школышто тунемше-влак «Лӱдшӧ мераҥ» йомакым модын ончыктеныт. Кок командылан шелалтын, пайремыш толшо-влак тӱрлӧ модышлаште шке вуй уш писылык, чолгалыкыштым ончыктеныт да таҥасеныт.

Чылан кидым кучен кож йыр пӧрдын у ий муро-влакым марла мурымо.

Вара Йӱштӧ Кугыза толын, да кажне йоча тудлан ончылгоч ямдылыме почеламутым лудын але иктаж вес номерым ончыктен пуэн. Теле оза чылаштлан пӧлекым кучыктен. Тыгак йоча-влакын ыштыме кидпаша конкурсым иктешлыме, сеҥышыш Марита Шорникова лектын.

У ий кож программе деч вара чылаштым пайрем ӱстел вучен. Толшо-влак йӱын-кочкын, модын юарлен, марий семым колыштын, икте-весе дене кутыралтен касым умбакыже шуэныт.

Пайрем программым тений шыжым да телым марий рушарня школышто туныктышо-влак, Т.Албахтина ден С.Акельдина, ямдыленыт, эртареныт, залым сӧрастареныт. Мутат уке, нунылан ача-ава да йоча-влакат полшеныт. Пӧлек-влаклан оксам ача-ава-влак деч Танян ден Светак погеныт. Пайрем ӱстелымат тӱшка вий дене чумырен шаренна.

Кастеным кумылан-влак Пеплери 14 тӱшкагудын мончан, каминан залыштыже жапым эртарен кертыныт. Ончыч Тарту Марий-влак Ушемын  погынымашыже эртен. Организацийым вуйлатыше Васли Николаевын ойжо почеш эртыше ий сай лектышан лийын. Ушемна Тарту изи калык-влак фестивальыште марий кочкышым, концерт программым ончыктен. Тыгак марий-влак нерген Парижыште, Ригыште ойлымо, марий мурымаш-куштымаш дене палдарыме. Таллинныште ярмиҥгаште кокымшо ий участвоватлена. «Марий ушем» ден «ВийАр-Рӱдерлан» «Умбалне Элнет ӱмбал канде» нотан муро погым лукташ полшенна да моло сомылат шукталтын.

Ушемна пелен кокымшо ий Марий рушарня школ пашам ыштен. Йоча-влаклан арняш ик гана 2 шагат марий йылме да 2 шагат музык, культур урок эртаралтын. Школым ончыч Валентина Семенова ден Анна Мишина вӱденыт. Тений шыже гыч — С.Акельдина ден Т.Албахтина. Погынымаште школым умбакыже посна лукташ да аттестоватлаш темлыме.

В. Николаев ушемын чолгаеҥже-влакым тауштен да нунылан Лайд Шемйэрын (Владимир Козловын) колтымо марла календарь-влакым да муро погым кучыктен. «Марий талешке Чумбылат» кечышотым Лайд шукерте огыл эше ешарен колтен ыле, тудыжо Таллинн марий-влаклан кодеш.

Погынымаш деч вара ласкан мончаш пурен, икте-весе дене ойласен, марий семым колышт шинчаш йӧн лийын.

Мучашыште Тарту Литератур пӧртым тауштынена ыле. Нуно эре мемнан ушемым умылаш тыршеныт: оксана уке гынат, пӧлемна гыч поктен луктын огытыл, тыгак ты пайрем эртарашат зал-влакым яра пуэныт. Эстонийысе изи калык-влак ассоциацийлан Пеплери 14-ын каныме пӧлемже верч счётым тӱлымыжлан таум ойлена.

Васли Николаев,
Тарту марий-влак ушемым вуйлатыше