Унчышто Сӱрем кумалтыш эрта

12 июльышто Морко район, Унчо селасе отышто Сӱрем кумалтыш лиеш. 

Петро кечын тушко яндар чон да шонымаш, тичмаш кинде-шинчал дене марий-влакым вучат. Сӱрем кумалтыш лач тыште да эше Киров областьысе Кетек кундемыште гына эртаралтеш.

Тений Унчо отым верысе ял шотан илемын, «Передовик» озанлыкын вийышт да Марий Элысе Тӱвыра, печать да калык-влакын пашашт шотышто министерствын полшымыж дене эрыктен, йытыраен шындыме. Тидыже республикыште этнокультурым вияҥдыме дене кылдалтше посна программа дене келшышын ышталтын.

Кодшо ийын У Торъял районысо ик отым эрыктыме гын, тений эше Шернур, Марий Турек, Советский районлаште икмыняр отым шотыш кондаш палемдыме.

Налмывер: «Марий Эл» жаплышташ