Марий национальный конгресс ыштыме пашажым иктешлен

Эртыше кугарнян Марий национальный конгресс 2011 ийысе пашам иктешлыме да конгрессын вуйлатышыжым сайлыме конференцийым эртарен.

Марий Элысе чыла район гыч представитель-влак толыныт. Уна семын Марий Элын тӱвыра, печать да калык-влакын пашашт шотышто министрже Михаил Васютин, Мер Каҥаш еҥ-влак Валерий Мочаев, Эрик Юзыкайн лийыныт.

Ыштыме паша нерген конгрессым вуйлатыше Эдуард Александров мутым кучен. Марий пайрем йӱлам илышыш шыҥдарен толмым, лӱмлӧ еҥ-влаклан шарныктыше оҥам почмым, самырык- влаклан слётым умбакыже эртарымым тӱҥ паша семын палемден. Ончыкыжым йоча марий муро фестивальым эртараш тӱҥалаш ойым ыштен. Ты пашалан оксам ойыраш келшыше еҥ-влакат улыт, палемден Э.Александров.

Конгрессын еҥже-влак вуйлатыме пашам Э.Александровланак ӱшаненыт.

Марий погынлан ямдылалтме йодышым ик эн кугу паша семын акленыт. Лишыл жапыште мер ушем-влак конференцийым эртарышаш улыт.

— Марий национальный конгресс — таче ик эн сайын пашам ыштыше, икшырымын вияҥше мер ушем. Чон ӱжмӧ дене ыштыме пашада лектышан лийже, — иктешлен вашлиймашым М.Васютин.

Зоя ГЛУШКОВА

Налмывер: «Марий Эл» газет