Марий йылмым тунемше финн-влак Марий Элыш толын каеныт (ВИДЕО)

Шочмо йылмынам Марий Элыште кугыжаныш йылме семын шуко тунемме верыште туныкташ тӱҥалыныт. Но тыгодым шинчымашын келгытше палынак йомеш. Эсогыл икмыняр марий ялыштат шочмо йылмым кугыжаныш йылме семын гына шымлат. Южо еҥже деч «Марий йылме дене умбаке кает мо?», «Кӧлан тудо кӱлеш?» манмымат колалтын. Яндар марий йылме дене мутланыше йот гражданиным ужыт гын, чот ӧрыт ыле.

А ме ужынна, мутланенна. Тиде арнян Йошкар-Олаш Хельсинки университет гыч делегаций толын. Чылаже индеш еҥ. Нунын коклаште ик профессор, ик докторант, а молыжо студент-влак. Нуно чыланат марий йылмым тунемыт, южыжо мутланенат кертеш. Профессор Янне-Сантери Саарикиви кундемышкына нылымше гана толын. МарКУ-со Финугыршанче институтышто марий йылме кафедрым вуйлатыше Лидия Матросова Яннен икымше гана толмыжымат шарна: «Тудо эше шкежат студент ыле. Мемнан выпускницына Светлана Элембаева тунам Финляндий гыч группым конден. Палемдыман, 2008 ий деч ончыч Суоми мланде гыч мемнан деке чӱчкыдын унала, йылмым тунемаш але стажировкыш толыт ыле. Кызыт тиде кыл уэш вияҥеш».

Финн родына-влак Йошкар-Олам ончен савырненыт, Советский районысо Ӱшнӱр школыш миеныт, калык кочкышым тамлен ончаш марий кафеш пурен лектыныт. Ик кечын Печать пӧртышкат толын кайышт, марий ТУЙ дене палыме лийыч. Финугыршанче иститутын тунемшыже-влак дене вашлиймаш эртаралтын. Тушто уна ден марий ӱдыр-рвезе-влак финн, англичан да марий йылме дене мутланеныт.

Вашлиймаш деч вара мемнан студентна-шамыч концертым ончыктеныт, дискотекым эртареныт. Самырык финн-влак марий муро почеш пеш куштышт. «Йӱржӧ йӱреш» мурым икмыняр гана колташ йодыч.

Мо оҥайже, делегацийыш пурышо южо студентше шым йылмым тунемеш. Марий Элыш тӱҥ шотышто шке оксашт дене толыныт. Изишак шийвундым Хельсинкисе ик фонд пуэн.

Марий кундемыште ныл кече веле лийыныт гынат (изарнян мӧҥгышт кудальыч), вес гана толаш кумылышт лекте, шонем. Меат йӧн лийме семын нунын деке Суоми мландыш миен толына. Йылмым гына тунемаш кӱлеш.

Тидын нергенак «Марий Эл ТВ»-н видеокаласкалымашыже:

Текст: Кугарня

Видео: video.vmariel.ru

Оставьте комментарий

Filed under Артикль-влак, Видео

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s