«Кандырам» боди-арт дене ушеныт (ФОТО, ВИДЕО)

Кодшо кугарнян Мишкан — Бажан корнÿмбалне, Нерге ял деч тораште огыл, йыргыктен йогышо памаш воктен йÿштö вÿдым подылаш чарналтыше еҥ-влак оҥай сÿретым эскерен кертыныт. Йомак тÿнясе семын пушеҥгыла коклаште вÿд водыж чÿчкалтен коштылден. Икганаште кок шиялтыш дене марий семым луктын, лышташ кокласе пеледыш-влакын чоныштымат савырен, юзо виян «кандырам» тавалташ таратен. Вараракше тудын йогынышкыжо памаш деке вÿд йÿаш волышо марий ÿдыр-влакат кумылын ушненыт…

Тыгай оҥай шонымаш республикысе уста марий-влакын уш-акылыштышт шочын да илышыш шыҥдаралтын. Сӱретче-влак тудым икымше марий боди-арт манын лÿмденыт.

«Боди-арт — авангард шÿлышан сымыктыш, вес семынже тудым кап-кыл искусство але айдеме кап-кылеш сÿретлыме сымыктыш, маныт. Ме тудым марий тема, бриллиант гай шергакан «кандыра» куштымашна дене кылдынена. Тудым шукыж годым калык вургемым чиен куштат, а ме тошто йÿлам у семын пойдарынена. У искусство дене кылдыме годым «кандыра»  у шÿлышым налын кертеш, шонена», — каласыш, пÿртÿс лоҥгаш икмыняр мастар еҥын лекме амал дене палдарышыла, республикысе лÿмлö художник Георгий Калитов.

Ты кечын ÿдыр-рвезе-влакын кап-кылыштым тыгак палыме марий сӱретче-влак Светлана Шамаева, Александр Шакиров да Георгий Гайнияхматовичын ончычсо студентше, шкеж нерген сай шомакым ойлаш амалым пуэн шуктышо самырык рвезе Радик Одри Мусин сöрастарышт. Кажныже чия да кистычке полшымо дене шке образым шочыктыш — иктыжын тудо марий сарзылан лишыл ыле гын, весын — ожнысо сылне Чачавийлан але чодыра кугыжан шочшыжлан.

Пÿртÿсын вий-куатше, калыкнан мастарлыкше вÿд водыжын (можыч, чодыра кугыза манашат  келша, кажне еҥ тудым шке семын умылен кертеш) тӱсака гоч почылто. В. Миндияров тудын койыш-шоктышыжым чылт артистлак келыштарен да шке илыш умылымаш дене пойдарен модо, чумыр шонымашым ик йогыныш виктараш полшышо вий семын ойыртемалте.

Творчество шÿлышан еҥ-влакын «кандыра» куштымашлан кызытсе жаплан келыштарыме сыным ешараш шонымышт вучыдымын утларак куатле савыртышым нале. Памаш воктек, пуйто ончылгоч кутырен келшымыла, марий сÿан калык волыш. Тальянка, тÿмыр, шиялтыш сем дене «кандырам» пунымашке оръеҥ ден качымарийжат, сÿан вате да марий, уна-влак, тыгак чылт йомакысе геройла сÿретлен пытарыме ÿдыр-рвезе-влак да Монар ялысе «Ший памаш» фольклор калык ансамбльын самырык куштызыжо-влак  ушнышт.

Мом ойлаш: «кандыра» — марийым ушышо, шÿм-чоным луштарыше, кандарыше, вий-куат дене пойдарыше куштымаш. Ура чонан ик киномастарын — Нерге ялын шочшыжо, Уфимский районысо Йоча творчество пöртыштö тыршыше кÿкшö категориян ешартыш шинчымаш педагог Андрей Аликовын — «кандыран» сымыстарыше, пÿтынек почын шуктыдымо вийже дене кумданрак палдараш кумылжо уло. Кугарнян усталык ешым памаш воктек чумыраш таратыше ик тале еҥже тудо ыле.

А такше тиде оҥай мероприятий боди-артым, фото да киноискусствым иквереш ушыш. Мастар-влакын тудын негызеш ямдылыме пашаштым эше ужына, шонем. А тиде кече кузерак эртымым сайынрак палаш шонышо-влаклан газетнан сайтышкыже (www.cholman.ru) шындыме фото-влакым ончалаш темлена.

Э. ГУБАЕВА
Мишкан район, Пошкырт кундем

Налмывер: «Чолман» газет

1 комментарий

Filed under Артикль-влак

One response to “«Кандырам» боди-арт дене ушеныт (ФОТО, ВИДЕО)

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Google photo

Для комментария используется ваша учётная запись Google. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s