Марий Эл радиом ыштымылан 6 ий темме лӱмеш 30 июльышто Йошкар-Олаште кугу концерт эртаралте.
Тиде ынде поро йӱлашке савырнен шуын, сандене тушко калык кажне ийын утларак да утларак погына. Тидым шотыш налынак, концертым тений «Дружба» стадионышто (снимкыште) эртарышт. Ӱмаште «Строительыш» 5 тӱжем еҥым веле пуртенытат, ончаш мийыше кокла гыч чыланжак логал кертын огытыл. Но теният сӱрет тыгаяк лийын – ятырыштлан мӧҥгеш савырнен каяшышт пернен, молан манаш гын стадион кугу гынат, 6 тӱжем еҥым веле пуртеныт.
Тӱрыс налмаште, концерт программе моло ийласе деч мыняр-гынат ойыртемалтше ыле. Тӱрлӧ оҥай татым келыштарен, ончаш толшо-влакын кумылыштым утларак нӧлташ тыршыме шижалте.
Концертым ласкан эртараш иктаж пел ужашыштыжырак йӱр йӱраш тӱҥалме йӧндымылыкым мыняр-гынат лукто гынат, мӧҥган-мӧҥгышкышт шаланен пыташ шагалынже вашкышт. Нӧреныт, кылменыт гынат, шукынжо тудым мучаш мартеак ончышт. Очыни, тидым шижаш огыл манынат, ятырынже кажне гаяк муро почеш чарныде куштышт.
Концерт жапыште ситыдымаш ден экшык-влак палдырнышт гынат, тӱрыс налмаште тыге каласаш лиеш: Марий Эл радион пашаеҥже-влак эртарыме пайремышкышт калыкым савырен моштат. Могай концертыш эше тынар шуко марий еҥ погына?
Л.КАМАЛЕТДИНОВА
М.Скобелевын фотожо
Налмывер: «Марий Эл» газет
MariUver 