МАФУН конгрессыште Марий Эл гыч 12 еҥ улеш

Финн-угор самырык тукымын чолга еҥже-влак Саранскыш чумыргеныт. Тыште 1-3 августышто Финн-угор самырык-влакын тӱнямбал ассоциацийыштын X конгрессше эрта.

Ныл секцийыште тӱп калык-влакын праваштым аралыме, этноэкономике, йылме, культур, туныктеж, СМИ дене кылдалтше тема-влакым тарватат. Вес кок ийлан МАФУН-ын президентшым сайлат. Кызыт тиде пашам Карелий гыч Алексей Цыкарев шукта.

Марий Эл гыч Саранскыш 12 еҥан делегаций каен. Тиде – самырык-влакын «У вий», «ВийАр» мер ушемыштын, «Югорно» бард-клубын да «Марий ушем» мер толкынын студент пӧлкажын ӱдыр-рвезыже-влак.

Налмывер: Увер йолва