15 апрельыште Россий Федерацийын сулло артистше, Марий Эл Республикын калык артистше Иван Смирновын бенефисше эртыш. Ты гана актёр Сергей Чавайнын «Мӱкш отар» пьесыж почеш шындыме спектакльым ойырен налын.
Иван Смирнов Марий драме театрыште 1985 ий годсек пашам ышта. А.В. Луначарский лӱмеш Театральный искусство кугыжаныш институтын актёр пӧлкажым РСФСР-ын калык артистше П.О. Хомскийын курсыштыжо (III национальный студий) тунем пытарымеке, М.Шкетан лӱмеш театрын турппышкыжо пашаш толын. Но тудым Совет Армий радамыш налыныт, да 1987 ий февральыште, служитлен пӧртылмек, театрыште пашам тӱҥалын.
Ту жап гыч тачысе кече марте актёр тӱрлӧ жанран спектакльлаште тӱрлӧ рольым модын. Бенефис кечын И. Смирнов марий литературылан негызым пыштыше писательын пьесыж почеш шындыме спектакльыште Пӧтырын рольжым модын. Тудо мӱкш отарыштыже илыше Клавийым индыра веле огыл, тудын деч утлаш шона. Пӧтыр тудым кадыр йолан шоҥго ӧрӧзӧйлан марлан пуэн колтынеже. Тидлан амалжат уло…
Спектакльыште Иван Смирнов уда койыш-шоктышан персонажын рольжым модын гынат, калык тудым садак моткоч шокшын вашлийын. Тидыжым актёрым саламлаш сценыш кӱзышӧ-влакат пеҥгыдемдышт. Тиде – Марий Эл Республикын Кугыжаныш Погынжын председательжын алмаштышыже Анатолий Иванов, Марий Эл Республикын культура, печать да национальность-влак паша шотышто министрын икымше алмаштышыже Вячеслав Актанаев, Йошкар-Олаште У Торъял землячествын председательже В. Наумов, У Торъял район, «1 Май» озанлыкыште социальный йодыш дене специалист А. Иванов, М.Шкетан лумеш Марий театрын тӱҥ режиссёржо Роман Алексеев да молат. Залыште шинчыше-влакат сценыш лектыч: кӧжӧ пеледыш аршашым кучыктыш, южыжо шергакан пӧлекымат ямдыленыт.
В.Веэс
Налмывер: shketan.ru
MariUver 