Ӱярня марий калыкын эн йöратыме да весела пайремжылан шотлалтеш. Тудо йӱштӧ телын озаланымыжлан мучашым ышта да чевер кечын волгыдыж дене чоным куандара.
Пытартыш жапыште марий пайремым тунемше-влак коклаштат эртарат. Калык йӱла дене йоча-влакым шуарымаш тӱвыргӧ саскам пуа, — ойлат психолог-влак.
4 мартыште Йошкар-Оласе 2 №-ан кыдалаш школын стадионыштыжо Марий тÿвыра рÿдер Ӱярня пайремым эртарен. Мероприятийыш 29-ше школ да 14№-ан гимназий гыч тунемше-влак толыныт.
Игече йÿштö шоген гынат, стадион тич погынышо калыкын кумылжым изишат волтен огыл. Вет Ӱярням кузеракын веселан, модын-юарлен эртарет, тыге телым лÿдыктен колтен, шошым ÿжат, маныт. Очыни, тунемше-влак тиде йÿлам сайын палат, садлан пагытым пеш кумылын эртареныт.
Тиде кечын пайремыш ушнышо кажне уна Ӱярнян тÿҥ йÿлаже – мелна дене сийлалтыныт, тунемше-влак тÿрлö оҥай модышышто, конкурслаште вийжым тергеныт.
Пайремым Марий тӱвыра рӱдерын «Чон оҥгыр» фольклор ансамбльже сöрастарен. Икманаш, тунемше-влак телым пеш чулымын ужаташ тыршеныт.
MariUver 