10 шыжан Марий Тӱрекыште видеомастар-влакын районысо «Тӱрэл-2010» кокымшо видеофильм фестивальышт почылтеш.
Ты гана фестиваль Туныктышын идалыкшылан пӧлеклалтын. Тудым Марий Тӱрек район администрацийын тӱвыра, капкультур да спорт пӧлкажын «Заря» каныме рӱдерже эртара. Ты рӱдерым вуйлатышыже — чапланыше видеомастар, Рушэл кӱкшытан видеофильм фестиваль-влакын лауреатше Иван Герасимов. Иван Ивановичын «Пӱрымаш гыч лаштык» фильмже тений Иркутскышто эртыше «Кол шинча» тӱнямбал фестивальыште эн сай режиссуро паша семын аклалтын да икымше вер дене палемдалтын.
— Тений «Тӱрэл-2010» фестивальыш Киров, Пермь, Глазов, Ижевск, Мурманск, Санкт-Петербург, Йошкар-Ола (поснак 27-ше школын «Трек» студийжым палемдыме шуэш), Кӹлемар, Маскасола кугыялла гыч видеомастар-шамыч толыт, — каласыш Иван Иванович. — Марий Тӱрек районна ты фестивальыш чолган ушна. Жюриште Киров областьысе тӱвыра колледжын кинофотоспециализаций предметым туныктышо Владимир Овчинников лиеш. А аклыше комиссийнам республикыштына палыме видеомастар, Йошкар-Оласе радиомеханике техникумын видеостудийжым вуйлатыше Василий Воробьёвлан вуйлаташ ӱшаныме.
«Тӱрэл» фестивальын тӱҥ призше — «Шӧртньӧ сузо». Тиде сувенирым Марий Тӱрек йоча сымыктыш школын сӱретче пӧлкажын туныктышыжо Надежда Роженцова ямдылен. Эн сай чынилыш, анимаций йӧн дене ямдылыме, рольым модман фильмлан да сем клиплан «Ший сузо» кучыкталтеш.
М.Васильев
Налмывер: «Марий Эл» жаплышташ
MariUver 
А мый тыге шонышым, Рушэл манаш вет ок лий. Россий — тиде федераций улеш, садлан руш-влаклан веле огыл. А вот Марий Эл ала Пошкырт Эл — тиде федераций огыл, садлан тыге манаш лиеш.