Пошкырт кундемыште финн-угор фестиваль эртен

Финн-угор калык-влакын «Самоцветы Прикамья» VII регион-влак кокласе тӱвыра да сымыктыш фестивальышт Пӱрӧ олаште тÿҥалтышым нале да эрлашыжым марий-влак илыме Мишкан да Калтаса кундемлам авалтыш.

Мишкан селаште Караидель район гыч «Ший памаш» ансамбль, Балтач район гыч «Чолга шÿдыр» куштышо калык ансамбль, Краснокам район гыч «Байрам» куштышо тевыкле ансамбль, Мишкан районысо йоча сымыктыш школын “Радуга” тевыкле куштышо ансамбльже, тиде район гычак «Ший памаш» фольклор калык ансамбль, «Мишкан кундем» семӱзгар ансамбль, «Солнышко» йоча куштышо коллектив, «Юго» куштышо коллектив, «Ӱжара» вокал калык ансамбль да «Эрвел» куштышо калык ансамбль мастарлыкыштым ончыктышт.

Фестивальыш погынышо калыкым Мишкан район администраций вуйлатыше В. М. Андреев саламлыш, коллектив-влаклан сеҥымашым тыланыш. Тӱвыра министерстве пеленсе Калык усталык рÿдерын йÿдвел-касвел пöлкажын директоржо В. К. Юрин фестивальыш ныл шÿдö утла еҥ ушнымым да нунын шке ойыртемалтше культурыштым арален кодымым палемдыш.

Фестивальым «Мишкан кундем» семӱзгар ансамбль почо, вара икте почеш весе моло коллектив-влак куштымаш да муро дене сценыш лектыч. Кажне ансамбль койышыжо, моштымашыже да ойыртемалтше ÿмбал вургемже дене ончышо-влакын кумылыштым савырыш. «Эрвел» куштышо калык ансамбльым совым рÿж кырен вашлийыч, тиде коллективын чолга куштымашыж дене Мишканыште фестиваль мучашке лишеме. Ансамбль-влаклан да нунын вуйлатышыштлан дипломым кучыктышт.

Калтасаште фестивальын унаже-влакым республикысе Тӱвыра министерстве пеленсе Калык усталык рÿдерым вуйлатыше Б. В. Ишбердин да район администраций вуйлатыше Р. Г. Нурытдинов саламлышт. Район культур пöрт ончылно, пайремлан келыштарен, марий да удмурт калыкын йÿлаштым, койыш-шоктышыштым почын пуышо сурт-оралтым сылнештарен «чоҥымо» ыле.

Мордва калыкын тӱвыра «Вастома» фольклор да этнографий калык ансамбль (Стерлитамак район) да «Ялгат» фольклор калык ансамбль (Ермекей район) ончыктышт. Удмуртий гыч «Инвожо» фольклор калык ансамбль ончаш толшо-влакын кумылыштым поснак ылыжтыш (нуно шукерте огыл Москошто «Минута славы» телепередачылан съемкышто лийыныт), а Уфа ола гыч «Ош Виче сем» фольклор да этнографий калык ансамбльым шÿлалташ тоштде колыштыч. Пайрем концертыште тыгак Калтаса районысо чыла ялсовет гыч сылнешке шкеыштык марий да удмурт коллектив-влак уна-влак дене пырля мурышт-куштышт.

Амалже могай лийын дыр, но ала-молан Марий Эл гыч фестиваль программыш пуртымо Ӧрша районын коллективше толын шуын огыл. Калтасаште зритель-влакын шокшын вашлиймышт уна-влакын чонешышт поснак поро шарнымашым коден.

Вес кечынже фестивальын корныжо Краснокам районыш шуйнен. Уна-влакым Корий ял воктене шокшын вашлиймек, Коян поселкысо тӱвыра пöртышкö ужатеныт. Финн-угор калыкын культурыжым ужаш тусо калыкланат пиал шыргыжалын.

Эн сай коллектив-влакын гала-концертышт 11 идымын Нефтекамск оласе филармонийыште пайрем кече-влакым мучашлыш. Фестивальым иктешлаш республикысе культур министрын алмаштышыже И. И. Махмутова да Калык-влак келшымаш пöртын вуйлатышыже В. Х. Азнаев толыныт ыле. Нуно Нефтекамск ола округысо администраций вуйлатышын алмаштышыже Т. С. Уляшина дене пырля погынышо калыкым шокшын саламлышт, фестивальым сылнештарыше коллектив-влаклан диплом ден шарнаш кодшо пöлек-влакым кучыктышт.

10 идымын фестивальын ик ужашыже Татышле районышто эртыш. Нефтекамскыште мучашлымашке эрлашыжым тусо удмурт коллектив-влак: «Гербер» трио, «Öрзиос» пöръеҥ вокал да «Зеч малпанъес» фольклор калык ансамбль-влак — ушнышт.

Эн сай коллектив-влак коклаште тыгак концертым Нефтекамск оласе филармонийын марий группысо артистше-влак, «Яндар памаш» марий фольклор ансамбль (Свердловск область Кÿшыл Пышма гыч), «Эльян» фольклор йоча тевыкле ансамбль, «Фантазия» куштышо калык ансамбль, «Жемчужина» куштышо ансамбль-влак (чыланат Краснокам район гыч) сылнештарышт. Тыгай кугу пайремыште, мутат уке, кумдан палыме «Дружба» (Нефтекамск ола) да «Эрвел» (Мишкан села) куштышо калык ансамбль-влак деч посна ямже тичмашак ок лий ыле дыр. Нуно залысе калыкым шке сескемышт дене ылыжтышт.

Кеч-могай кугу але изи пашан сайжат, ситыдымашыжат лиеш. Тиде пайремынат пайдале да калыклан кÿлешан улмыжым шотыш налын, верысе организатор-влак ончыкыжым пашаштым посна экшык-влакым кораҥдымашке виктарат, шонена. Вет тыгай мероприятий-влак тÿҥ шотышто тидлан верчак эртаралтыт: улыжым аралаш, сайжым шукемдаш, ситыдымашыжым кораҥдаш.

И. ГУБАЕВ, Н. КАЙНИЕВА
В. Мадияровын, И. Губаевын фотошт

Налмывер: «Чолман» газет

2 комментария

Filed under Артикль-влак

2 responses to “Пошкырт кундемыште финн-угор фестиваль эртен

  1. Опанас

    Фестивальын лӱмжым марлаш кусараш кӱлеш! «Самоцветы» мут марлаште уке да тӱрлӧ калыкын культур поянлыкшым ончыкташ тиде мутым огыт кучылт. Фестивальым марла «Чолман кундем шонанпыл» манаш темлем. Кӧ вес семын шона?

  2. Вачис

    Мые «Ош Виче толкын» манаш темлем или «Ош Виче сем»

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s