Йошкар-Олаштыш алык марла мырышы рок-группа «Пайрем» тӹжем йӓрӓн сӓндӓлӹкӹштӹ кым ӓрня нӓрӹ гастрольышты ылын дӓ коклы утла концертӹм пуэн.
Музыкыштыш ти культура акцин лӹмжӹ SUGRI-ROCK ылын, кышты марынвлӓ гӹц пасна Петрозаводск гӹц Санту Кархун Talvisovat карел рок-группыжы дӓ Удмурти дон Екатеринбург гӹц Silent Woo Goore дӓ H-Ural ансамбль ылыныт. Саам рок музыкым Spire & Stalut анжыктен.
Концертвлӓ Йыдвел Суоми гӹц, Санта Клаусын халажы, Рованиеми лишӹц, Кемийӓрви гӹц тӹнгӓлӓлтӹнӹт. Шамаклан, Оулу халазывлӓ финн-угр рок музыкым финн-угр Сирӹзӹвлӓн Конгресс эртӹмӹ годым колыштыныт. Тӹнӓм ти корнывлӓм сирӹшӹ удмурт дӓ карел рок-музыкантвлӓ доно пӓлӹмӹ лин.
«Пайрем» концертшӹм 9-шӹ сентябрьын Korjaamo-н, тошты трамвай депон концерт залыштыжы пуэн. Концерт яжон эртӹш, анжаш дӓ колышташ толшывлӓ рок музыкым яратышывлӓ ылевӹ. Тидӹ гӹц пасна концертӹш Хельсинки университетӹштӹ мары йӹлмӹм тӹменьшӹвлӓӓт толыныт.
Группын мырызыжы Эльвира Курай шачынжы Öршӓ район гӹц, но репертуарыштыжы кырык мары мырывлӓмӓт кычылтеш. Сек пӓлӹмӹжӹ нӹнӹ логӹц «Сола вуйыштет кок яжо млоец». Лачокшымат, тошты халык мырывлӓм у интерпретаци доно колыштат, öрӓт дӓ варажы нӹнӹм угӹц колыштмы шоэш.
«Мары Элышты техень рок-группывлӓ уке доно иктӹ, но шукыштат агыл, нӹнӹ шачаш тӹнгӓлӹт», — манын Эльвира Курай попа. «Сӓмӹрӹк марынвлӓ туан йӹлмӹштӹ докы мелӓн лиштӹ манын, музыкыштат у формывлӓм кӹчӓлмӹлӓ дӓ ти шотышты мӓмнӓн мырвлӓнӓ ӹшке рольӹштӹм мадыт. Лин кердеш, Мары Элышты музыкы ӹлӹмӓшӹштӹ мӓ революцим ӹштӹшӹвлӓ ылына, вет мӓ яктенӓжӹ иктӓт марла нелӹ рок стиль доно марла мырывлӓм мырыде».
Халык мырывлӓм материал семӹнь кычылташ гӹнь, цилӓ мырыжок яралеш ак лӓк. Каеш, ти шотышты кырык мары халык мырывлӓ рок инструментовкышты яжоракын шактат, нӹнӹ шукырак семӓн ылыт. Эльвира Курайын музыкантвлӓжӹ, гитарист дон тӹмӹрзӹвлӓжӹ Йошкар Ола руш музыкант эргӓшвлӓ ылыт, мары рок музыкантвлӓм группым погымышты годым, моаш нелӹ ылын, но кӹзӹтшӹ мары музыкантвлӓӓт сагажы пӓшӓм ӹштӹнештӹ, манын мырызы Суомин ТВ-лӓн интервьюштыжы келесӹш.
Тӹ кечӹнок «Пайрем» пресс-конференциштӓт ыльы, кышты Финн-угр халыквлӓн Консультаци Комитетӹн эдемвлӓжӹ ылевы. Мары Эл гӹц тӹштӹ Культура министр Михаил Васютин ылын. Тӹдӹ семӹнь кӹзӹт мары сӓмӹрӹквлӓн туан йӹлмӹ докы интересӹштӹ улы, нӹнӹ туан йӹлмӹнӓм у формывлӓ доно кычылтнештӹ дӓ тидӹжӹ «Пайрем» группын керӓл ылмыштыжат раскыдын каеш.
Консультаци комитетӹн вуйлатышыжы коми Валерий Марков финн-угр сӓмӹрӹквлӓ пӹтӓртӹш жепӹн активизируялташ тӹнгӓлӹнӹт, ик вӓре иктӹ виӓнг гӹнь, ти регионын опытшым вес вӓреӓт пӹсӹнрӓк кычылташ тӹнгӓлӹт манын попыш. Музыкым анжалаш гӹнь, каеш, ти пӓшӓштӹ марынвлӓ анзылны кеӓт, но Комиштӓт тидӹ гӹц пачеш ак кодеп, мӓ донна джаз конкурсвлӓм эртӓрӓш тӹнгӓлӹнӹт, манын В. Марков ушештӹш.
Эстони гӹц толшы Пауль Аристе Центржым вуйлатышы Тыну Сейленталь Руш Элыштыш финн-угрвлӓн тетявлӓштӹлӓн туан йӹлмӹштӹм тыменяш школвлӓштӹ йöнвлӓм ӹштӹмӹлӓ манын келесӹш. Тетявлӓ туан йӹлмӹштӹм ак тыменеп гӹнь, тӹнӓм тӹдӹ йöрӓш тӹнгӓлеш.
«Sugri-rock» концертвлӓ дон Финн-угр халыквлӓн консультаци Комитетӹн погынымашыжым Суоми – Руш Эл Ушем эртӓрен.
H-Ural рок-группа Екатеринбург гӹц толын
Консультаци Комитетӹн эдемвлӓжӹ
Хельсинкиштӹш Кырык мары Клубын эдемвлӓжӹ Мары Элын культура министр М. Васютин сага
Валерий Аликов,
Хельсинки
MariUver 
Супер фотовлä!
http://aamulehdenblogit.ning.com/profiles/blogs/sugrirock-2010-vastavirrassa
Наркоман гай веле койыт, особенно бас-гитара.
Кыды бас-гитаристшӹ, Вачис? Вара Вачис, токет ядмашем улы: махань культурым тӹнь яралеш шотлет: кӹзӹтшӹ жепӓшӹм, кыдым сӓмӹрӹквлӓ ӹштӓт, ӓль тӹдӹм кыдым 60-70 иӓш фольклор ансамбль папа-тьотявлӓ? ӓль рафинируйымы, кӹзӹтшӹ ӹлымӓш гӹц кодшы мары культурым? Тидӹжӹ культурынан цилӓ монгыржым ӓвӓлтӓ доко. Марий Эл радиом интернетӹшты колыштам, шанымем доно шукы солистшок ак мыры, а тамахань ынгылыдымы юк доно ньыргыжеш. Тӹнӓм шаналтет: ти мырым тӓ колышташ, тӓ агыл. А ти материалыштыш музыкантвлӓ, лачокшымат яжо музыкым ыштӓт, техеньӹм, кыдым шукы марынжок акат ынгылы вӓк. Вачислӓн, векӓт, мелешӹжӹ 1970-шы ивлӓн ылшы «Верасы» группы постолвлӓн мӱӓн юк доно мыры мырывлӓштӹ веле мелешӹжӹ вазыт. Тама туран келесӹшӹм гӹнь, ит йӓтлӹ. Марынвлӓ, кӹзӹт «тошты-у» кӓнгӓшӹмашвлӓм нӓнгенӓ дӓ ти кӓнгашӹмӓшвлӓнӓжӹ цилӓ энергинӓм качкыт, седындон ум ӓштӓшнӓ, жепнӓжӹ ак код. Каеш, мары халыкын культурыжы кризисӹштӹ дӓ ти кризислӓн ӹнде 10 и шоэш. «Мӓ донна илӓ яжо, цилӓ яжо» манмы шаявлӓ мӓмнӓм алалат дӓ нерӹктат веле. Малын культурыштына у формывлӓ ак каеп, малын тидӹ гишӓн ик мары газет-журналыштат ик дискуссиӓт ак ке? Цилӓн нерӓлтен колтеннӓ ма? Иктӹм марынвлӓ монденнӓ, культурым министерствывлӓ агыл, а сирӹзӹвлӓ, артиствлӓ, артньыквлӓ дӓ культурыштыш креативӓн эдемвлӓ виӓнгдӓт. Министерствывлӓ курируят веле, а фантази культуры эдемвлӓн вуйышты шачшашлык.
чынак, шым умло.
Вачисӹн йӓнгжӹм ӹнде вес пачаш шуаш дӓ ыргаш ак ли. Тӹдӹ йӓнг семешӹжӹ ылшы музыкым ярата. Сӓмӹрӹквлӓн субкультурым шукыжымок специалиствлӓ яжон ынгылат. Йӓнгеш вацмы шотыштыжы, тидӹ эдемӹн иӓш донжы кӹлдӓлтеш. Метал дӓ рокышты сӓмӹрӹквлӓн йӓнгӹштӹ ӹшке корныштым кӹчӓлмӹм анжыкта, тӹдӓт музыка вел дон шотан ӓль агыл лин кердеш. Вачисӹн тетявлӓжӹ улы гӹнь, тӹдӹ пуры йӓнгжӹ дон тетявлӓжӹм ынгылаш цацышашлык ылеш, пӓлӹде тӓ наркоман партьы ылыда мандеок. Кӱ комментарийвлӓм лыдын, тӹдӹ Вачисӹн махань мырызывлӓм яратымыжым йыдпелӹн трӱк кӹньӹлтӹмӹкӓт келесен пуэн кердеш.
«Кугарня» газетӹштӹ Мары музыкы тӱняштӹ революцим ӹштен манын сирӹмӹ. Анжалашда:
http://gazetakugarnya.ru/
Тӧрӹм келесӓш гӹнь, шаяжы Мары Элыштыш музыка ӹлӹмашӹштӹш революци гишӓн кеа. Махань революцим мары группывлӓ тӱняымбалныш кӱкшӹцӹштӹ ӹштен кердӹт, тидӹм эче вуйыштем шолтен лыктын ам керд. Тенге гӹнят, яжо группа ылеш ти «Пайрем», шанем Кырык ӓль Кожла марыштат техень группа лиэш гӹнь, пиш яжо лиэш. А Вачис вӹкӹ йӓтлӓш ак кел, вет тӹдӹ мӓмнӓн йӹлмӹнӓжым прамой ак ынгылы.