Марий книга савыктыш у книгам темла. Тиде — лудшын пагалымашыжым сулен налше да сылнымутышто шкенжын ойыртемалтше корныжым тошкышо серызе Геннадий Алексеевын «Куку муро ойган» повесть ден ойлымаш-влак погыжо.
Геннадий Валерианович Алексеев тений 17-ше пургыжын 55 ияш лÿмгечыжым палемдыш. Тудо Морко районысо Эҥерсола ялыште кресаньык ешеш шочын-кушкын. Йошкар-Оласе 1-ше номеран музык-сÿретче школ-интернат да Октябрьский кыдалаш школ деч вара МарКУ-н историй да йылмышанче факультетшым тунем лектын. «Ямде лий», «Марий коммуна» газет, «Марий Эл учитель», «Туныктышо», «Ончыко» журнал редакцийлаште тÿрлö должностьлаште тыршен. Марий книга савыктышыште директорлан ыштен. 2000 ий гыч лютеран черкын онаеҥже улеш.
Геннадий Алексеевын сылнымут корныжым кум ужашлан шелаш лиеш: тÿҥалтыште тудо поэзий аланыште шкенжым ончыктен, вара прозо дек шÿмаҥын, 2000 ий гыч чоншÿлыш-сотемдарыше литературым кусарымаште тырша.
У книгашке кок повесть ден ойлымаш-влак пуреныт. Персонажышт — марий ялыште илыше тыглай еҥ-влак — авторлан пеш палыме да лишыл улыт. Нунын шÿм-чон поянлыкыштым, койыш-шоктышыштым, илыш умылымашыштым аклаш серызе оҥай сюжетым, проста да лывырге йылмым кучылтеш.
Марий книга савыктыш
Налмывер: Марий Эл тÿвыра министерстве
MariUver 