Кок сӱрет, кок мургорно

Марий да финн сӱртече ден мутмастар-влакын Сӱрет ончерышт да поэзий касышт 5.8. — 23.8.2010

Ончер 5.8. 18 шаг. почылтеш
Kaaпелитехдас, Валссаамо
Taллбергинкату 1 C 15, Хельсинки

Марий сӱретче-влак: Юрий Таныгин ден Сергей Таныгин

Марий почеламутчо-влак: Альбертина Иванова ден Зоя Дудина

Финн сӱретче-влак:Тиити Менделин, Туула Никулайнен, Катя Йухола

Финн поэт-влак: Сиркка Туркка ден Й.К.Ихалайнен

Сӱрет шке туняжым темла, сӱрет мургорно дене таҥ йоҥга, поэт-влак шонымаш ярымышытым шке лодымаҥдат, кусарыше-влак шочмо йылмыш пыштат. Ик йылме весым вашталта, шке кумылжым темлыше чон коржмо корно ден йӱк да сем туня иквереш ушнат.

Хельсинки олаште верланыше Каапелитехдасын Валссаамо галерейыштыже эртарыме выствке ден поэзий кас финн сӱретче-влакын ӱмаште шыжым Марий Элыште Тимофей Евсеев лӱмеш Кугыжаныш тоштерыште эртарыме финн да марий поэт ден сӱретче-влакын ончерыштын да поэзий касыштын кокымшо ушашыже. Марий Элыш финн сӱретче ден поэт-влакым Марий тӱвыра министерстве ӱжын да ончерым эртараш полшен. Марий сӱртече да поэт-влак дене пырля Хельсинкиш Марий тӱвыра министрын алмаштышыже Галина Ширяева толеш. Суомин тӱвыра министрже Стефан Валлин «Кок мургорно кок сӱрет» ончерын да поэзий касын аралышыже лияш келшен.

Сергей ден Юрий Таныгинмыт изак-шоляк улыт. Нуным когыньыштымат марий этнофутуризмын мастарышт семын палат. Таныгинмыт пашаштым республик да тӱнямбал выставкылаште ончыктеныт, мутлан, Таллиннысе Сымыктыш музейыште.

Альбертина Иванова дене Зоя Дудина кызытсе марий поэзийын шӱдыржӧ улыт. Нунын почеламутышт финн, эстон, англичан, руш да моло тӱрлӧ йылмылашкат кусаралтыныт. Финн йылмыш кусарыме анталогийым «Ваштар-влак йӱлат» лӱм дене Эдико книга савыктыш 2009 ийыште луктын.

Тиити Менделин, Туула Никулайнен да Катя Юхола шуко проектыште пырля пашам ыштеныт. Менделин акварельзе улеш, Никулайнен куэм да йыр кундем сӱретче семын палыме, Юхола тӱрлӧ сынан техникым кучылтеш. Нуно чыланат тӱрлӧ культурым да изи чотан калык-влакын илышыштым кумылын шымлат.

Й.К.Ихалайнен ден Сиркк Туркка кызытсе финн поэзийын кӱкшын аклыме поэтышт улыт. Турккалан 1987 ийыште Финляндийын Кугыжаныш премийжым пуымо. Ихалайнен 2010 ийыште Эйно Лейнон премийжым сулен налын. Нунын поэзийышт шуко тӱрлӧ йылмыш кусарыме.

Проект шуктымаште тыгак марий шымлызе, кусарыше, философий доктор Софья Чеснокова-Манай шуко тыршен. Тудо Финн литератур информаций рӱдер полшымо дене Сиркка Туркан поэзийжым кусара.

Родо калык сӱрет да мутмастарже-влакын пырля паша ыштымышт лектышан. Ончылно у проект-влак вучат.

Софья Чеснокова-Манай